Pronađena davno ukradena slika Anri Matisa
U bazi podataka podataka ukradenih i nestalih umjetnina ima oko 360.000 ukradenih umjetnina. Tek pet do 10 odsto uspije da se pronađe
Britanski "lovac" na ukradene umjetnine pronašao je sliku francuskog slikara Anri Matisa ukradenu iz muzeja u Stokholmu prije 25 godina.
Matisovu sliku "Le Jardin", procijenjenu na oko milion eura, pronašao je Kristofer Marinelo, stručnjak londonske agencije Art Loss Register (ALR), najveće globalne baze podataka ukradenih i nestalih umjetnina.
"Fantastično je što se slika pojavila", kazala je portparol muzeja "Moderna Museet" u Stokholmu Kristin Ek.
"Ukradena je tako davno da smo već bili izgubili svaku nadu", rekla je Ek, a prenosi agencija Rojters.
Sliku je u maju 1987. odnio lopov koji se u muzej uvukao tokom noći. Krađa je prijavljena i Interpolu i ALR-u. Pronađena je pošto je jedan britanski trgovac umjetninama odlučio da prije prodaje provjeri da li se slučajno nalazi u tom registru.
"Srećni smo jer se slika u dobru stanju. Ovo je dobar početak nove godine", kazala je Ek.
U bazi podataka ALR ima oko 360.000 ukradenih umjetnina.
Neke od njih Marinelo, kako sam kaže, posebno traži - slike Vermera, Degasa i Rembranta vrijedne 300 miliona dolara ukradene 1990. iz muzeja "Isabella Stewart Gardner Museum" u Bostonu, za koje je raspisana nagrada od pet miliona dolara, kao i Rafaela izgubljenog u nacističkim pljačkama za vrijeme Drugog svjetskog rata.
Tek pet do 10 odsto ukradenih umjetnina uspije da se pronađe.
( Vijesti online )