Virus Schmallenberg zahvatio 186 njemačkih farmi

Virus Schmallenberg, koji pogađa ovce, koze i goveda proširio se na 186 farmi u Njemačkoj, gdje je prvi put registrovan u novembru, pokazali su najnoviji rezultati analize instituta Friedrich-Lefler (FL) koji prati širenje bolesti.

Sada je virusom Schmallenberg zahvaćeno osam saveznih država u Njemačkoj, prenosi AFP. U Evropi su slučajevi zaraze tim virusom dosad registrovani i u Belgiji, Velikoj Britaniji, Holandiji i Francuskoj, saopštio je institut FL. Evropska agencija za sigurnost namirnica tvrdi da se virus Schmallenberg ne prenosi na ljude, a kod životinja se može manifestovati groznicom, padom proizvodnje mlijeka, ili uginućem fetusa.

Evropska agencija za sigurnost namirnica tvrdi da se virus Schmallenberg ne prenosi na ljude

Ruska Federalna službe za veterinarsku i fitosanitarnu inspekciju saopštila je da je od srijede privremeno zabranila uvoz žive krupne rogate stoke i od nje dobijenog genetskog materijala iz Njemačke, Holandije, Belgije i Francuske i takođe sitne rogate stoke i genetskog materijala iz Francuske, zbog virusa Schmallenberg. Ova služba je takođe potvrdila zabranu uvoza krupne i sitne rogate stoke iz Velike Britanije, kao i uvoza genetskog materijala od tih životinja od 1. februara, prenosi Rojters. “Uvoz govedine iz tih zemalja za sada nije zabranjen”, rekao je predstavnik federalne veterinarske službe Aleksej Aleksejenko i dodao da se situacija prati i da će, pri najmanjoj opasnosti, biti donešene mjere zabrane uvoza.

( Vijesti online )