Ljubav između oca i kćerke koja pomjera granice

Kažu da je imati dijete u životu najveći blagoslov, a da li je onda nemogućnost podizanja tog djeteta najveća bol? Kako ostati ravnodušan na uplakani zov djeteta koje samo želi da bude u vašim rukama. Ali, bolest ne bira, prosto se desi i uzme najbolji dio vas.

Jedna takva priča je upravo prenesena na filmsko platno, drama “Očevi i kćeri”, snimljena pod rediteljskom palicom italijanskog režisera Gabrijela Mućina, inače reditelja filma “U potrazi za srećom” koji je Vil Smitu donio drugu nominaciju za Oskara.

Svi su osjetili i vidjeli tu povezanost između oca i ćerke, tu jaku sponu ljubavi koju teško šta može prekinuti. Lik djevojčice koja od malih nogu u ocu vidi snagu, podršku, izbavitelja, istjerivača strašnih snova, sve je to on, jedan čovjek – tata. U ovom filmu to je Džejk Dejvis (Rasel Krou), pisac, dobitnik Pulicerove nagrade, koji je doživio nervni slom gubitkom svoje žene. Ostao je sam u ulozi udovca i još težoj ulozi samohranog oca kćerke Kejti (Amanda Sajfrid) i istovremeno, na drugom frontu vodi komplikovanu bitku sa teškim mentalnim stanjem.

Filmski zaplet se gradi oko priče o porodici, kao i o višeslojnoj ljubavi između roditelja i djeteta. “Očevi i kćeri” govori o gubicima i bolu, o mnogim životnim temama, ali i o tome kako problemi zbližavaju ljude i pomažu im da zajedno prebrode teške trenutke.

Nakon 27 godina, Kejti je odrasla djevojka i njeni demoni iz prošlosti prijete da ugroze vezu sa zgodnim i dobronamjernim momkom Kameronom (Aron Pol).

Ovo je film o snazi ljubavi između oca i kćerke, o nadi i pobjedi ljubavi, očinske, momačke, djevojačke, film poslije kojeg ćete imati potrebu da čvrsto zagrlite svog oca.

Nakon mjuzikla “Jadnici” (Les Miserables) Amanda i Rasel su ponovo filmski tandem, a društvo na setu prave im Aron Pol, Džejn Fonda, Dajen Kruger, Brus Grinvud i Olivija Spenser.

"Očevi i kćeri" je italijansko-američka koprodukcija koja je prikazana u preko 50 zemalja, a na programu Televizije Vijesti je u subotu od 20 časova.