Sposobna za ozbiljnije uloge

Glumica Lindzi Lohan iskreno je pričala o frustraciji zbog toga što je u karijeri često svrstavana u isti kalup, ističući da je sposobna za mnogo više uključujući rad sa renomiranim dramskim rediteljima poput Martina Skorsezea.

Glumica, koja trenutno promoviše svoj novi film “Freakier Friday”, proslavila se početkom 2000-ih u porodičnim i tinejdžerskim komedijama kao što su “The Parent Trap” i “Mean Girls”. Ipak, iza sebe ima i ozbiljnije uloge, poput onih u političkoj drami “Bobby” (2006) i filmu “A Prairie Home Companion Roberta Altmana”, gdje je glumila uz Meril Strip.

U intervjuu za The Times, Lohan je otvoreno priznala da osjeća kako joj karijera nije pružila dovoljno prostora za raznovrsnost:

“Bila sam oduševljena što sam radila na ‘A Prairie Home Companion’, a ipak i danas moram da se borim za slične uloge, što je frustrirajuće. Znate me kao nekoga ko radi komedije, ali znate i da mogu i drugačije. Samo mi dajte priliku. Želim da prekinem taj krug i otvorim vrata ka nečemu novom, tako da ljudi više nemaju izbora nego da me vide drugačije. A ako mi se Skorseze javi naravno da neću reći ne”, kazala je Lohan. Na pitanje kakve bi filmove voljela da snima, glumica odgovara:

“Nedostaju mi filmovi koji pričaju prave priče, poput ostvarenja ‘Doručak kod Tifanija’. Danas nema mnogo velikih filmova tog tipa koje želim da pogledam. Postoji ta praznina, a ja želim da je ispunim”.

Lohan se posljednjih godina vratila u centar pažnje, posebno nakon što je prošlogodišnji božićni film ‘Our Little Secret’, koji je snimila za Netflix, postao jedan od pet najgledanijih na pomenutoj platformi.

M. V.

( M.V. )