Pušteno 100 đaka otetih u Nigeriji, više od 100 još u zatočeništvu

Ukupno 100 đaka kidnapovanih iz katoličke škole u ​​Nigeriji prošlog mjeseca pušteno je na slobodu, saopštilo je tamošnje Hrišćansko udruženje.

Više od 100 učenika još uvijek je u zatočeništvu.

Oko 300 djece oteto je sa 12 njihovih nastavnika, kada su naoružani ljudi napali katoličku školu Svete Marije u zajednici Papiri, u saveznoj državi Niger, 21. novembra. Pedeset njih je pobjeglo u narednim satima.

Portparol Udruženja Danijel Atori rekao je za Asošiejted pres da je crkva saznala da su djeca puštena tokom vikenda i da će biti prevezena u glavni grad države Niger, Minu, kako bi se sastali sa zvaničnicima.

Još uvijek nije objavljeno kako su djeca puštena i da li je neko uhapšen.

Nijedna grupa nije preuzela odgovornost za otmice, ali je lokalno stanovništvo okrivilo naoružane bande koje napadaju škole i putnike radi otkupa.

Napad u državi Niger bio je jedan od niza nedavnih masovnih otmica u Nigeriji, a dogodio se četiri dana nakon što je 25 školske djece oteto pod sličnim okolnostima u gradu Maga u susjednoj državi Kebi, koji je udaljen 170 kilometara. Crkva u južnoj državi Kvara takođe je napadnuta otprilike u isto vrijeme, 38 vjernika otetih u tom napadu prošlog mjeseca je oslobođeno.

Nigerijske vlasti obično ne govore mnogo o naporima spasavanja, a hapšenja u takvim slučajevima su rijetka. Analitičari vjeruju da je to zato što se obično plaća otkupnina. Zvaničnici ne priznaju plaćanje otkupnine.

( Beta )