Iran proglasio vojske evropskih zemalja terorističkim grupama kao odgovor na potez EU
"U pokušaju da pogode Revolucionarnu gardu... Evropljani su sebi pucali u nogu i još jednom donijeli odluku koja je protivna interesima njihovog naroda time što su slijepo slušali Amerikance", rekao je predsjednik iranskog parlamenta Mohamad Bager Galibaf
Iran je proglasio vojske evropskih zemalja terorističkim grupama, rekao je danas predsjednik parlamenta, navodeći da je to uzvratna mjera poslije odluke Evropske unije (EU) da proglasi Islamsku revolucionarnu gardu terorističkom organizacijom.
Predsjednik parlamenta Mohamad Bager Galibaf rekao je danas da se po zakonu njegove zemlje, kontramjerama protiv proglasa Islamske revolucionarne garde terorističkom organizacijom, vojske evropskih zemalja smatraju terorističkim grupama, prenosi Al Arabija na engleskom.
EU je, u četvrtak, Revolucionarnu gardu Irana uvrstila na listu terorističkih organizacija.
"U pokušaju da pogode Revolucionarnu gardu... Evropljani su sebi pucali u nogu i još jednom donijeli odluku koja je protivna interesima njihovog naroda time što su slijepo slušali Amerikance", rekao je Mohamad Bager Galibaf poslanicima, noseći uniformu Revolucionarne garde u znaku podrške tim elitnim snagama, prenosi Rojters njegovu izjavu.
Bager alibaf je rekao da će parlamentarni odbori razmatrati protjerivanje vojnih atašea EU zemalja, i o tome se dogovoriti sa ministarstvom spoljnih poslova.
Iranska Revolucionarna garda uspostavljena je poslije iranske islamske revolucije 1979. da štiti teokratski šiitski vladajući sistem, i ima veliki uticaj u zemlji, kotnroliše čitave djelove privrede i oružanih snaga.
( Beta, Ne.V. )