Vratila se Serena Vilijams, izgubila je od teniserke koja nije bila ni rođena kada je osvojila sedam grend slem titula

Serena Vilijams nije uspjela da na željeni način obilježi dugo očekivani povratak na teniske terene.

Nakon četiri godine pauze, legendarna Amerikanka završila je nastup već u prvom kolu Vimbldona, pošto je poražena od Australijanke Maje Džoint rezultatom 6:3, 6:7 (6), 6:3.

Mnogo se očekivalo od 44-godišnje Vilijams, koja je na turnir dobila specijalnu pozivnicu. Postojala je nada da će postati najstarija teniserka koja je ostvarila pobjedu u singlu na terenima Ol Ingland kluba još od Martine Navratilove, kojoj je to uspjelo sa 47 godina još 2004. godine. Ipak, Džoint je imala drugačije planove.

Dvadesetogodišnja Australijanka, koja nije ni bila rođena kada je Serena osvojila prvih sedam od ukupno 23 grend slem titule u singlu, odigrala je bez imalo respekta prema slavnoj rivalki. Ignorisala je ogromnu pažnju koja je pratila Serenin povratak i upisala najveću pobjedu u dosadašnjoj karijeri.

Na Centralni teren izašla je sa samo jednom pobjedom u posljednjih 12 turnira, ali ga je napustila kao junakinja dana, nakon što je eliminisala jednu od najvećih teniserki svih vremena.

Iako nije iskoristila meč loptu u taj-brejku drugog seta, Džoint nije izgubila samopouzdanje. Ostala je smirena, nastavila u istom ritmu i oko 45 minuta kasnije slavila veliku pobjedu, nakon što je Serena poslala ritern u aut.

( Dl.M. )