Ibrahimović: Nasilje nad ženama i djevojčicama zahtijeva snažan odgovor i u digitalnom prostoru

Nasilje nad ženama i djevojčicama, uključujući ono koje se omogućava ili pojačava upotrebom tehnologije, zahtijeva odlučan i sveobuhvatan odgovor međunarodne zajednice, poručio je potpredsjednik Vlade i ministar vanjskih poslova Ervin Ibrahimović.

Kako je saopšteno iz Ministarstva vanjskih poslova, Ibrahimović je to kazao na ministarskom okruglom stolu posvećenom borbi protiv nasilja nad ženama i djevojčicama omogućenog tehnologijom, u okviru 81. zasjedanja Generalne skupštine Ujedinjenih nacija.

Ibrahimović je kazao da nasilje nad ženama i djevojčicama predstavlja jedno od najrasprostranjenijih i sistemskih kršenja ljudskih prava širom svijeta, ističući da njegova razmjera zahtijeva odlučan i sveobuhvatan odgovor međunarodne zajednice.

On je posebno skrenuo pažnju na rastući fenomen nasilja koje se omogućava ili pojačava upotrebom tehnologije, a koje, kako je naglasio, često ostaje neprijavljeno i nedovoljno prepoznato.

„Nasilje na internetu ne postoji izolovano od nasilja u stvarnom životu. Ono je dio istog obrasca“, poručio je Ibrahimović.

Kako je istakao, posljedice nasilja u digitalnom prostoru mogu ozbiljno ugroziti fizičko i psihološko blagostanje žena, njihove ekonomske mogućnosti, kao i njihovo učešće u javnom životu.

Ibrahimović je naglasio da borba protiv nasilja nad ženama i djevojčicama mora pratiti tehnološke promjene i nove oblike nasilja, uz istovremeno snaženje mehanizama zaštite ljudskih prava, dostojanstva i ravnopravnosti.

Kako je saopšteno iz Ministarstva, učešće Crne Gore na ministarskom okruglom stolu potvrđuje njenu posvećenost međunarodnim naporima usmjerenim na prevenciju i suzbijanje svih oblika nasilja nad ženama i djevojčicama, uključujući nove oblike nasilja koji se pojavljuju u digitalnom prostoru.

Navodi se da je okrugli sto održan u organizaciji UN Women i Hrvatske.

( MINA )