FIFA kaznila Fudbalski savez Španije zbog islamofobičnih povika na utakmici sa Egiptom
Kazna je uslijedila nakon što su navijači uzvikivali: „Ko ne skače, musliman je“.
FIFA je kaznila Fudbalski savez Španije (RFEF) sa 20.000 dolara i uvela ograničenja za gledaoce zbog islamofobičnih povika tokom prijateljske utakmice Španije i Egipta, odigrane 31. marta.
Savez će na narednoj domaćoj prijateljskoj utakmici Španije morati da zatvori najmanje 15 odsto kapaciteta stadiona ili da ta mjesta namijeni određenim grupama, poput porodica, studenata i organizacija koje se bore protiv diskriminacije. Očekuje se da bi utakmica mogla da bude odigrana u junu 2027. ili martu 2028. godine.
Kazna je uslijedila nakon što su tokom meča, koji je završen bez golova na stadionu RCDE u Barseloni, navijači uzvikivali:
„Ko ne skače, musliman je“.
Prema odluci FIFA, povici su se čuli u 10. i 47. minutu utakmice. Nakon što se slogan drugi put začuo, spiker na stadionu upozorio je publiku, a na semaforu je prikazana poruka protiv diskriminacije.
Krilo španske reprezentacije Lamin Jamal, koji ima marokanske korjene i nije bio direktna meta povika, osudio je takvo ponašanje, ocijenivši ga kao „nepoštovanje i nešto što se ne može tolerisati“.ž
„Kada vjeru koristite kao sredstvo za podsmijeh na terenu, pokazujete da ste neupućeni i rasisti“, napisao je Jamal u aprilu na Instagramu.
Španska policija pokrenula je istragu dan nakon utakmice, a FIFA je potom započela disciplinski postupak. Disciplinska tijela FIFA ocijenila su da su „stroge sankcije neophodne“, ali su istovremeno uzele u obzir da je riječ o prvom prekršaju španskog saveza, kao i preventivne mjere koje je preduzeo, brzu osudu incidenta i saradnju sa nadležnim organima.
Prema izvještaju Rojtersa, RFEF planira da se obrati Sudu za sportsku arbitražu (CAS), nakon što je FIFA prošle sedmice odbila njegovu žalbu.
Tokom postupka španski savez je tvrdio da riječ „musliman“ sama po sebi nije uvredljiva niti pogrdna. Smatrao je da incident treba razmatrati u skladu sa članom 17, koji se odnosi na političke, ideološke i vjerske poruke, kao i druge uvredljive sadržaje, a ne prema članu 15, koji se bavi diskriminacijom i rasističkim vrijeđanjem.
FIFA je odbacila taj argument, obrazlažući da diskriminacija ne podrazumijeva nužno upotrebu eksplicitne uvrede. Kako je navedeno u odluci, određeni izraz može biti diskriminatorski ako se koristi kao „uvreda, poruga ili oznaka inferiornosti“.
( Dl.M. )