„Maske” najbolja predstava 11. MAKADO-a, priznanja i Goranu Šušljiku i Mirjani Spaić
Nagrada „Sat kula” za najbolju predstavu pripala je ostvarenju u produkciji regionalnih teatarskih kuća, dok je Dražen Šivak nagrađen za glumačku bravuru
Predstava „Maske”, u produkciji Dubrovačkih ljetnjih igara i više pozorišnih i produkcijskih kuća iz Zagreba i Beograda, proglašena je najboljom na 11. Manifestaciji kamernih dramskih ostvarenja – MAKADO. Odluku je jednoglasno donio stručni žiri, koji je priznanje „Sat kula” za najbolju mušku ulogu dodijelio Goranu Šušljiku, dok je nagrada za najbolju žensku ulogu pripala Mirjani Spaić.
Šušljik je nagrađen za ulogu u predstavi „Zagonetne varijacije”, u produkciji Teatra Vuk i Yugoarta iz Beograda. Kako je navedeno u obrazloženju žirija, priznanje mu je pripalo za izuzetan senzibilitet i razborit stil igre, kojim je na sceni oživio lik nobelovca Abela Znoka.
Nagradu za najbolju žensku ulogu Mirjana Spaić osvojila je za ostvarenje u predstavi „Krevet od lišća”, nastaloj u koprodukciji KIC-a „Budo Tomović” iz Podgorice, Bunt scene i kompanije Pigmalion. Većinom glasova žirija prepoznata je njena partnerska igra sa Milicom Kekić i Đorđijem Tatićem, kao i način na koji je, bez patetike i pretencioznosti, iznijela slojevitu dramsku ulogu.
Priznanje za glumačku bravuru pripalo je Draženu Šivaku za ulogu u predstavi „Maske”. Žiri je jednoglasno ocijenio da je Šivak ostvario nesvakidašnju glumačku virtuoznost i upečatljiv odnos sa publikom.
Obrazlažući odluku o najboljoj predstavi, žiri je istakao da „Maske” oživljavaju duh maske od prapočetaka do savremenog doba, koristeći znakovit i promišljen teatarski jezik. Posebno je izdvojena snaga scenskih tišina, u kojima se, kako je navedeno u obrazloženju, uspostavlja zajednički ritam disanja i osjećanja izvođača i publike.
O nagradama je odlučivao žiri u sastavu Davor Dragojević, predsjednik, te Jelena Nenezić i Jelena Kontić Lakićević.
Ovogodišnji program MAKADO-a obuhvatio je šest predstava: „Krevet od lišća”, „Zagonetne varijacije”, „Fetišist”, „Najbolji čovjek na svijetu”, „Džepovi puni kamenja” i „Maske”. Različiti scenski pristupi i glumački senzibiliteti obilježili su šest pozorišnih večeri, tokom kojih je publika imala priliku da pogleda ostvarenja koja otvaraju različite teme i donose raznovrsne teatarske izraze.
Jedanaesto izdanje manifestacije završeno je dodjelom priznanja „Sat kula”, a u čast nagrađenih izvedena je monokomedija „Kako postati žena kojoj se sve prašta”, u izvođenju Milice Šćepanović, prošlogodišnje dobitnice priznanja za glumačku bravuru.
MAKADO se održava s ciljem afirmacije kamernog dramskog izraza, a i ovogodišnji program potvrdio je da intimna forma pozorišta pruža prostor za otvaranje kompleksnih tema i neposredan susret umjetnika i publike.
( Kultura Vijesti )