Kožu očistite korom od banane, kesicama čaja odmastite... - Vijesti.me
NAMIRNICE KOJE POMAŽU U ČIŠĆENJU

Kožu očistite korom od banane, kesicama čaja odmastite...

Ako kožne cipele istrljate unutrašnjom stranom kore od banane iznenadiće vas nevjerovatan sjaj

Ilustracija
Ilustracija (Foto: Pixabay)

Kućni poslovi poslovi su malo kome na top-listi omiljenih zadataka jer im jednostavno nikad nema kraja. Zato je dobrodošla svaka pomoć koja čišćenje čini manje zamornim i istovremeno daje dobre rezultate, a neke namirnice možete iskoristiti upravo u tu svrhu.

Limun

Izvrstan je za uklanjanje kamenca – dovoljno je polovinom limuna istrljati slavine ili pločice i limunska kisjelina će uraditi svoje. Jednako je djelotvoran it u kombinaciji s krupnom soli za dubinsko čišćenje drvenih dasaka za rezanje. Može poslužiti i za uklanjanje mrlja od crnog vina na odjeći: mrlju najprije treba preliti bijelim vinom, što će je razrijediti, a potom očistiti limunovim sokom.

Banana

Kad pojedete bananu, nemojte baciti koru jer njome možete učiniti čudo za svoje kožne cipele ili čak namještaj. Ispolirajte ih unutrašnjom  stranom kore od banane i iznenadiće vas nevjerovatan sjaj.

Čaj

Nemojte bacati ni iskorištene kesice čaja jer ih možete upotrijebiti za pranje masnog posuđa. Napunite sudoperu prljavim posuđem, prelijte vrućom vodom i ubacite nekoliko kesica čaja. Čaj će pomoći u odmašćivanju i ubrzati pranje.

Krastavci

Čišćenje lica korom od krastavaca poznati je recept za ljepotu i svježinu, ali isti postupak možete primijeniti i na kuhinjskim površinama za uklanjanje mrlja. Komade krastavca možete iskoristiti i za uklanjanje mrlja s nerđajućeg čelika, dok špoljašnji dio kore dobro briše šare od bojica na zidovima.