Za ljubitelje krompira: Brz i jeftin ručak - Vijesti.me
ŠPANSKA TORTILJA

Za ljubitelje krompira: Brz i jeftin ručak

U tortilju od krompira možete dodati i malo narezane slanine ili kobasice, a možete napraviti i verziju sa tunjevinom

Španska tortilja
Španska tortilja (Foto: Shutterstock)

Ako tražite recept za jednostavan i brz ručak isprobajte takozvanu tortilju od krompira, tradicionalno špansko jelo napravljeno od namirnica koje većina uvijek ima u kuhinji.

Sastojci:

- 4 srednja krompira
- 1 veća glavica luka
- 4 jaja
- 6 velikih kašika maslinovog ulja
- so i biber

Priprema: 

Krompir oljuštite, operite i izrežite na manje kocke, a luk nasjeckajte na sitno. Na tiganju zagrijte tri kašike maslinovog ulja, ubacite luk i malo prodinstajte dok ne požuti. Zatim dodajte krompir pa i njega dinstajte. Posolite i pobiberite. Maknite ga s vatre kad se zapeče.

Jaja razbijte i stavite u veću posudu, dodajte malo soli i izmutite ih. Dodajte u posudu zapečeni krumpir i luk i malo promiješajte. U tiganj u kojem ste pekli krompir stavite 3 kašike ulja i zagrijte pa ubacite mješavinu jaja, krompira i luka. Ostavite na laganijoj vatri, bez miješanja, kako bi se dno zapeklo. Kada vidite da je dno tortilje zapečeno, tiganj prekrijte tanjirom pa je okrenite i izvadite tortilju. Prevrnite i vratite na tiganj kako biste zapekli i drugu stranu. Kada se i druga strana zapeče, tortilja je gotova.

U tortilju možete dodati i malo narezane slanine ili kobasice. Njih u jelo dodajete u fazi dinstanja luka pa potom sve radite prema receptu. Možete tortilju dopuniti i tunjevinom iz konzerve. Nju dodajete u jelo u fazi povezivanja jaja s krumpirom i lukom. Dakle, kada razmutite jaja, dodajte u njih krompir, luk i tunjevinu pa promiješajte.


Najčitanije iz sekcije Kuhinja