Lovćen je seriju nepobjedivosti produžio u crnogorskoj metropoli turizma - Cetinjani su slavili protiv Mogrena sa 2:1 i to im je četvrti vezani meč bez poraza (tri trijumfa).
Vanja Tatar je u 34. minutu iz penala donio prednost gostima, a u posljednjim sekundama prvog poluvremena Mogren je izjednačio pogotkom Žarka Grbovića.
U slabijem ritmu u drugom poluvremenu Lovćen je u pravom momentu prelomio utakmicu i „ubio u pojam” domaćina - strijelac je bio Darko Vučić u 61. minutu poslije asistencije Ivana Delića.
"Došli smo po tri boda, pokušali da se nadigravamo, ali teren nam nije baš dozvolio. Utakmica je bila borbena, a bili smo bolji za taj jedan gol. Imamo dobru ekipu, a vrijeme je bilo da pojačanja počnu da se uklapaju. Polako hvatamo vazduh poslije ranog početka priprema i nadam se da ćemo protiv Grblja u narednom kolu nastaviti pozitivnu seriju rezultata", rekao je iskusni vezista Lovćena Nenad Brnović.
Mogren je ostao na samo četiri boda iz sedam kola. Ovo mu je drugi vezani poraz, nakon što je izgubio u Pljevljima.
"Vidio sam dvije loše ekipe, od kojih je ona manje loša zasluženo pobijedila. Imali smo velikih problema s povredama prije meča, a Lovćen je kao iskusna ekipa znao da kazni našu lošu igru. Treba da izvučemo pouke, jer ovo nije igra, već neko neuspješno zabavljanje", kritičan je bio trener Budvana Brano Milačić.
Bonus video:
