Serena ponovo predala meč, Bjanka osvojila titulu - Vijesti.me
TURNIR U TORONTU

Serena ponovo predala meč, Bjanka osvojila titulu

Serena Vilijams je u svom 96. finalu ostala na 72. naslova, a posljednji je osvojila još 2017. na Australijan Openu

Serena Vilijams i Bjanka Andreesku
Serena Vilijams i Bjanka Andreesku (Foto: AP)

Predajom Amerikanke Serene Vilijams nakon samo četiri odigrana gema i rezultata 3:1 za njenu protivnicu u finalu WTA Premier 5 turnira u Torontu, 19-godišnja Bjanka Andreesku postala je prva kandska teniserka koja je osvojila naslov pobjednice u 50-godišnjoj istoriji Rodžers kupa. 

Serena Vilijams je kod vodstva Andreesku 3:1 odlučila da preda meč, a kao razlog je navela bolove u leđima.

Tako je Andreesku stigla do drugog naslova u karijeri i drugog u ovoj sezoni, u kojoj je premijerni WTA trofej osvojila u Indijan Velsu.

Finalni trijumf donio joj je 521.530 dolara i 900 bodova koji će 19-godišnju Kanađanku dovesti u ponedjeljak do rankinga karijere, 14. mjesta na WTA listi.

Serena Vilijams je u svom 96. finalu ostala na 72. naslova, a posljednji je osvojila još 2017. na Australijan Openu. U 2019. godini 37-godišnja Amerikanka odigrala je svega sedam turnira, a ovo joj je već četvrta predaja. 

Završila je samo mečeve na Grend slem turnirima: porazom od Kristine Pliškove u četvrtfinalu Australijan opena, porazom od Sofije Kenin u 3. kolu Rolan Garosa i porazom u finalu Vimbldona od Simone Halep.

Bez borbe je predala meč sestri Venus na turniru u Rimu, nije igrala ni dvoboj 3. kola u Miamiju protiv Kineskinje Ćiang Vang, dok je u Indijan Velsu predala meč Garbine Muguruzi kad je Španjolka vodila sa 6:3, 1:0.