Snimak pljačke zlatare u Splitu: Ukraden nakit vrijedan oko 135.000 eura - Vijesti.me
SVE JE TRAJALO MANJE OD DVA MINUTA

Snimak pljačke zlatare u Splitu: Ukraden nakit vrijedan oko 135.000 eura

Policija je u izvještaju navela da je ukradena veća količina nakita

Screenshot/Twitter
Screenshot/Twitter (Foto: twitter.com/JuricNovaTV)

Zlatara u centru Splita opljačkana je u noći između nedjelje i ponedjeljka, a ukraden je nakit čija je vrijednost, prema riječima vlasnika, oko milion kuna (oko 135.000 eura), saopštila je u ponedjeljak splitska policija.

Policija je u izvještaju navela da je ukradena veća količina nakita. Obavljen je uviđaj i traga se za počiniocima, prenosi Indeks.

Na snimcima nadzornih kamera vide se trojica pljačkaša odjevena u bijele kombinezone. Imali su rukavice i voki-tokije, dok je jedan od njih imao slušalicu u uhu.

Nova TV je objavila snimak pljačke.

"Ovo je snimak pljačke zlatare u Splitu jutros u 03:13 sati! Trebalo im je manje od dva minuta za milionsku pljačku", napisao je novinar Nove TV Mario Jurič na svom Tviter nalogu. 

Vlasnik zlatare navodi da su znali šifru za rolo vrata, nakon čega su razbili staklo i nesmetano ušli. U velikim torbama su odnijeli sve zlato iz ormara, a sa sobom su ponijeli i blagajnu zlatare.