U sjevernoj Kosovskoj Mitrovici mirno, ali napeto - Vijesti.me
MANJE PRODAVACA NA PIJACI

U sjevernoj Kosovskoj Mitrovici mirno, ali napeto

Građani navode da nisu uplašeni, ali da je sve teže da mirno prihvate stalne tenzije i odluke koje donose vlasti u Prištini

Kosovska Mitrovica, protest
Kosovska Mitrovica, protest (Foto: BETAPHOTO/Igor Majstorovic/DS)

U sjevernom dijelu Kosovske Mitrovice jutros je mirno ali napeto.

Poslije jučerašnjih mirnih protesta zbog hapšenja četiri osobe i poruka koje su sa tih skupova upućene, a to su da će Srbi ostati na svojim ognjištima ali da traže ukidanje takse od 100 odsto na robu iz Srbije i Bosne i Hercegovine i puštanje na slobodu uhapšenih Srba, vanredno je sinoć zasijedao krizni štab.

Na sastanku kriznog štaba četiri opštine na sjeveru Kosova utvrđeni su dalji koraci za organizovanje normalnog života.

Subotom je ovdje pijačni dan, a jutros je primjetno manje prodavaca, koji nisu došli zbog uvedenih taksi a manje ih je iz srpskih sredina iz centralnog dijela Kosova, kojima je ova pijaca jedino mjesto gdje mogu da prodaju svoje proizvode.

Građani navode da nisu uplašeni, ali da je sve teže da mirno prihvate stalne tenzije i odluke koje donose vlasti u Prištini.