Rekonstrukcija uva izvedena pomoću pijavica - Vijesti.me
uspješan zahvat

Rekonstrukcija uva izvedena pomoću pijavica

"Tijelo je vrlo efikasno u stvaranju novih vena i arterija, pa su pijavice samo privremene”

rekonstrukcija uva
rekonstrukcija uva (Foto: The New England Journal of Medicine)

Devetnaestogodišnjakinji je uspješno rekonstruisano uvo koje je izgubila prilikom napada psa, i to uz pomoć nekoliko pijavica, navodi se u studiji objavljenoj u časopisu New England Journal of Medicine.

Plastični hirurzi su uglavnom osposobljeni za šivenje odsječenih dijelova tijela i takvi slučajevi rekonstrukcije su jednostavniji, budući da je rez čist i oštar.

Ali, lijevo uvo ove djevojke bilo je u potpunosti otkinuto, što je opeaciju činilo mnogo složenijom. Pomoću mikroskopa i drugih osjetljivih instrumenata, hirurški tim pronašao je malu arteriju prečnika samo 0,3 milimetra, te prišio uvo pomoću tri mala šava. Arterija je donijela svježu krv u prišiveno uvo, ali hirurzi nisu mogli da pronađu venu za drenažu krvi nazad u tijelo. Hirurzi su se tada okrenuli drugoj tehnici – pijavicama.

"Tijelo je vrlo efikasno u stvaranju novih vena i arterija, pa su pijavice samo privremene”, rekao je dr Stiven Sulivan, plastični hirurg u bolnici Rhode Island. Više od dvije sedmice, djevojka se oporavljala u bolnici sa pijavicama pričvršćenima na lijevo uvo. U međuvremenu je uvo samo razvilo sopstvene vene i pijavice su uklonjene. Danas je ožiljak jedva vidljiv, a djevojka nema problema sa sluhom budući da joj je u napadu stradao samo vanjski dio uva.

Rekonstrukcija uva vrlo je složen i izazovan zahvat zbog sitnih vena i arterija koje krvlju snabdijevaju to područje. U literaturi je dosad zabilježeno samo oko 50 odsto uspješno izvedenih operacija.

 


Najčitanije iz sekcije Nauka