Aljoša Šerić: Uradio sam pjesmu sličnu onima koje sam slušao kao klinac - Vijesti.me
PJESMU PREDSTAVILI NA ZAGREBAČKOM FESTIVALU

Aljoša Šerić: Uradio sam pjesmu sličnu onima koje sam slušao kao klinac

Frontmen benda “Pavel” Aljoša Šerić i autor singla “Ne daj na nas” priča o tome kako je došlo do saradnje sa Tedijem Spalatom

iz spota za numeru “Ne daj na nas”
iz spota za numeru “Ne daj na nas” (Foto: Screenshot/youtube)

Arhaičnu duetsku pjesmu “Ne daj na nas” koju su otpjevali Tedi Spalato i “Pavel”, predstavili su na nedavno završenom Zagrebačkom festivalu.

Pjesma nosi starinski prizvuk, a o tome kako je došlo do saradnje sa Spalatom, frontmen, gitarista, osnivač grupe “Pavel” i autor pjesme “Na daj na nas” Aljoša Šerić otkriva: “I moja supruga Tonka, inače vokal grupe ‘Pavel’ i ja smo iz Splita. Doduše, ja sam u tom gradu živio do 12. godine, dok je Tonka tamo živjela do odlaska na fakultet. Oboje smo rasli uz glas Spalata i nekako je ova saradnja bila prirodan slijed događaja. Demo snimak sam ja otpjevao, ali kad sam je preslušao nekako mi se činilo da bi Tedi to izveo mnogo bolje od mene. Baš sam u svakoj frazi čuo njegov glas. Pozvali smo ga, poslali pjesmu, svidjela mu se i pristao je da je snimi sa nama. Čak i ti gudači koji su ubačeni u aranžman koji je radio Ante Gelo dali su pjesmi posebnu čar”, smatra Šerić.

Iako su poznati po romantičnim pjesamama, numera “Ne daj na nas” razlikuje se od ostalih kompozicija koje je snimio “Pavel”.

“Pjesma je u stvari slična stvarima koje sam ja slušao dok sam bio klinac. Obično dok bi me spremala za školu majka bi puštala Radio Split, a sa tih talasa uvijek su išle ovakve pjesme. Ti gudači nekako su je tek učinili starinskom, zato mi je i posebno draga”, priznaje Šerić dodajući da je za numeru “Ne daj na nas” snimljen spot koji je režirao Radislav Jovanović Gonzo.

Gotovo da ne postoji godina, a da Šerić, bilo sa bendom “Pavel” ili kao autor Tonkinih pjesama ne učestvuje na Zagrebačkom festivalu. Upravo sa tog festivala potekli su neki od najvećih hitova “Pavela” među kojima su “Čuvaj me” i “Poslije nas”, dok je Tonka pjevala “Pozitivizam”. Do sada se ne može pohvaliti nagradama na ovom takmičenju. Međutim, to što bi numere već naredne godine osvajale priznanja za pjesme koje su se najviše vrtjele sa prethodnog izdanja, mu više imponuje.

“To potvrđuje da žiri nema pojma (smijeh). Bez lažne skromnosti, mislim da je upravo balada ‘Ne daj na nas’ bila najbolja na ovogodišnjem izdanju i nemojte misliti da sam subjektivan. No, mislim da je presudilo to što je arhaična i nije u dosluhu sa onim što se danas snima u pop muzici. Ipak, komentari na istu su pozitivni, a to mi je najbitnije. Sudeći po tome kako se kotira na top listama, siguran sam da će se dugo slušati”, kaže Šerić.

Pored toga što piše pjesme za grupu “Pavel”, Šerić je autor numera koje je napravio za samostalne koje grade on i njegova supruga Tonka. Kako kaže, rijetko radi za druge, no eto, jednu od njegovih pjesama otpjevao je i Massimo Savić.


“Kad pišem vodim se time da napravim što bolju pjesmu i da se meni sviđa. Izbjegavam da pišem za druge izvođače, ali i kad se to desi ne razmišljam hoće li te numere postati hitovi. Trudim se da zadovoljim svoj ukus i ono što sam ja, pa ako se on pogodi sa ukusom publike i muzičkih kritičara i urednika, dobro jeste, ako ne patim previše”, ističe Šerić.

Numere Pavela u filmu “4 ruže”


Krimi-drama “Četri ruže”, inače prvijenac Baranina Vasilija Nikitovića osvojila je publiku ne samo zbog radnje filma, već i zbog muzike, a čak dvije numere grupe “Pavel” se pojavljuju u ovom ostvarenju - “Ljubav” koja se našla čak i na trejleru i “Poslije nas”.

“Reperka Marija Jelić iz sastava ‘Bičarke na travi’ bila je ujedno muzička urednica filma. Trebala im je numera za jednu od bitnijih scena u filmu i valjda je slučajno na Youtube servisu došla do naše nuemre ‘Ljubav’. Kontaktirala nas je i rekla kako bi odlično pasovala u filmu i mi smo sa oduševljenjem prihvatili njenu ideju da se naša pjesma pojavi u filmu ‘4 ruže’. Bili smo kasnije na beogradskoj premijeri i stvarno je film odličan, a nama je drago što smo makar na ovaj način bili dio istog”, kaže Šerić.

Inače, numere “Poslije nas” i “Ljubav” dio su trilogije pjesama koju je predvodio singl “Čuvaj me”, a kojima je “Pavel” predstavio Tonku kao novog vokala benda.


Najčitanije iz sekcije Muzika