Džoni Štulić oglasio se nakon dugo vremena: Ljudi su govna, kurče se na moj račun - Vijesti.me
"SEBE NE PODNOSIM, KOGA ĆU PODNOSITI?"

Džoni Štulić oglasio se nakon dugo vremena: Ljudi su govna, kurče se na moj račun

"Posljednjih 25 godina u ogledalu se ne podnosim. Postao sam ružan. Kad se čovjek ne kultiviše... I sad da podnosim sve vas. Po sebi sudim sve. Sebe ne podnosim, kog ću podnositi. Ne gledam nikog. Bol mi nanose. Razumiješ? Što tu ima čudno?"

Džoni Štulić
Džoni Štulić (Foto: web)

Branimir Džoni Štulić u utorak je proslavio svoj 64. rođendan, a tom je prilikom dao i ekskluzivni intervju za Avaz.

Frontmen legendarne grupe "Azra" danas živi daleko od medija u holandskom gradu Huten pokraj Utrehta i rijetko daje intervjue no ovaj se put otvorio i progovorio o svom rođendanu, godinama, nezadovoljstvu i "eksploataciji njegovih djela na YouTubeu".

O raznim pisanjima i tumačenjima njegovih pjesama na internetskim portalima nije imao pozitivne komentare.

"To je sve odavno izobličeno. Pošto ja nikad o tome nisam govorio. I neću. Ja imam grdnih problema inače sa svim, i s Vikipedijama... To niko pojma nema, a tako drsko i bezobrazno pišu kao da su mi čučali u skutima 50 godina. Veze s ničim nemaju, a bagra piše, mora popunjavati prostor jer su njih naučili prije 20 godina da jedino što znaju raditi je da bacaju kamene blokove s vrha zgrade ljudima na glave. Drugo ne znaju. Kako je sve to otišlo u pičku materinu. Ljudi su po sebi nikakvi, bagra i đubrad. I onda više ne možeš disati, a kamoli misliti pa nešto reći", rekao je Džoni.

O nagađanjima o tome kome su posvećene njegove pjesme, rekao je: "Ja sam sve pjesme napravio sebi. Nema veze da li se ona zove Mona Lisa ili Larisa. Da Vinči je iza toga. Da Vinči - mislim na sebe. Pas laje zbog sebe, a ne zbog sela. Kad čovjek nešto kaže, on misli na sebe, secira sebe, a pripisuje drugom. A što drugo zna osim sebe."

Komentarisao je i svoj rođendan i izjavio kako ga ne slavi te kako mu čestitke ništa ne znače. "Što će mi sve te godine. Podsjećaju na loše stvari. Kvare mi raspoloženje. Nisu godine samo broj nego su konkretne. Naravno da čovjek stari. Ide mi na živce", rekao je.

Spomenuo je i da mu nije drago što se tolika prašina digla oko njegovog rođendana. "Nije mi drago. Mene nikad u životu nije nazvao normalan čovjek koji, recimo, radi nešto, već sve neki lezilebovići, kako god uzmeš".

Džoni je spomenuo i da ga izrazito ljuti "eksploatacija njegovih pjesama na YouTubeu".

"Svaki ponaosob bi htio da ima sve moje pjesme na svom sajtu. Jer to mu je jedini način, inače je nitko i ništa. I oni se krvavo bore za moje, a s lakoćom gube svoje, i zemlju, i državu i pasoš. I što god hoćeš. Krvavo se bore za ono što nije njihovo. Jebe se njima za pjesme, oni svoj ništavni ego hoće isturiti. Nemaju što drugo pokazati, kurče se na moj račun, i onda se, naravno, mrze i potkopavaju. Besprizorna govna drska. Nema riječi za to, osim da im se glave samo skidaju. Džaba su se rodili" rekao je.

"Još samo ovo da kažem: Ja u svojoj karijeri, koja traje već 40 godina, nikad nisam takvu omrazu navukao kao s ovim YouTubeom i s tim skidanjem pjesama. Upravo zbog toga. To je bagra koja, osim cinkarenja, dojavljivanja, uhode, drugo ništa ne zna. Drugo ne znaju osim bacanja kamenih blokova na glave s vrha zgrade. A hoće da žive. I naravno da sam u govnima".

Za kraj je progovorio i o vlastitim demonima.

"Posljednjih 25 godina u ogledalu se ne podnosim. Postao sam ružan. Kad se čovjek ne kultiviše... I sad da podnosim sve vas. Po sebi sudim sve. Sebe ne podnosim, kog ću podnositi. Ne gledam nikog. Bol mi nanose. Razumiješ? Što tu ima čudno?"