bez nervoze

Uštedite vrijeme i pripremite se za praznike bez stresa i panike

Prije nego što počnete da paničite, imamo nekoliko ideja za vas kako uštedjeti na vremenu i tako narednih prazničnih dana sve obaviti bez trke
0 komentar(a)
Ažurirano: 25.02.2019. 07:55h

Decembar je za mnoge najužurbaniji i “najzaposleniji” mjesec u godini. Imamo toliko toga da obavimo: šoping, planiranje druženja s poslovnim partnerima i prijateljima, čišćenje kuće, pečenje kolača, dolazak rodbine...

Ponekad sve to izgleda krajnje nemoguće.

Prije nego što počnete da paničite, imamo nekoliko ideja za vas kako uštedjeti na vremenu i tako narednih prazničnih dana sve obaviti bez nerviranja, trke, stresa, a sve da biste više uživali u ovom, inače, predivnom periodu.

Jednostavno - skratite svoj popis obaveza

To je naš prvi i osnovni savjet: zaista, morate li da uradite ama baš sve zacrtano?

Naš prvi i osnovni savjet: zaista, morate li da uradite ama baš sve zacrtano?

Razmotrite listu prioriteta.

Sigurno su velike šanse da ćete neke stvari moći lagano da maknete s popisa ili da ih makar odložite dok ne prođe “novogodišnje i božićno ludilo”.

Zatražite pomoć

Ko kaže da morate sve sami da završite?

Možda preuzimate mnogo na sebe jer volite ove praznike, ali sva radost ima da ispari kad se uhvatite za glavu od previše posla i uočite da ne znate gdje biste prije.

Promijenite to: ove godine zaposlite svoje ukućane da vam pomognu oko svih obaveza (i nemojte popustiti kada oni počnu da se izvlače!).

Razmjena kolača

Umjesto da sami pečete pet različitih vrsta kolača, ove godine dogovorite razmjenu kolača s članovima šire porodice ili prijateljicama: svaka od vas prema dogovoru ispeče više jedne vrste kolača, što je lakše nego više različitih vrsta, i onda ih samo razmijenite.

Tako ćete svi imati više vrsta kolača, iako ste pekli samo jedne, a uštedjećete na vremenu i živcima.

Zapakujte poklone odmah

Ne pravite grešku da samo odlažete poklone kada ih kupite, jer ćete tako završiti s brdom poklona koje morate da upakujete u zadnji čas – prije ih zapakujte odmah kada ih kupite, tako će vas sve dočekati spremno za praznike.

Izvlačite imena za poklone

To je dobar savjet kako da uštedite i na vremenu i na novcu ovih praznika.

Umjesto da kupujete poklone cijeloj rodbini i prijateljima, dogovorite se sa svima (naravno, posebno s rodbinom i posebno s prijateljima) da izvlačite imena, odnosno da svi poklon kupuju samo jednoj osobi čije ime izvuku.

Kupite poklone samo klincima, a s odraslima se dogovorite tako – posebno je zahvalno ako imate veliku rodbinu i širok krug prijatelja.

Zabava? Da, ali svako neka donese nešto

Kao i kupovina poklona i kuvanje za veći krug ljudi može da bude stresno i naporno.

Ako osjećate da prosto nemate volje i ne stignete sami sve da obavite za druženje na koje vam se najavilo “brdo familije” ili prijatelja, dogovorite se s njima da vam pomognu. Vi napravite glavno jelo, a oni neka donesu salate, priloge ili desert.

Tako će se svi uključiti i podijeliti teret, a vi nećete cijeli dan provesti u kuhinji.