Kad se u glavi zavrti: Bezazleno ili simptom ozbiljne bolesti? - Vijesti.me
VAŽNO JE OTKRITI UZROK

Kad se u glavi zavrti: Bezazleno ili simptom ozbiljne bolesti?

Specifični poremećaji su kretanje i bježanje predmeta pred očima ili osjećaj okretanja vlastitog tijela u prostoru, zatim osećaj gubljenja u prostoru, propadanja, uzdizanja i zanošenja u stranu ili naprijed – nazad

Ilustracija
Ilustracija (Foto: Shutterstock)

Vrtoglavica je neodređen izraz koji bolesnici upotrebljavaju da bi opisali nekoliko različitih subjektivnih stanja. Uz privid kretanja često je prisutan i funkcionalni okulomotorički poremećaj (nistagmus), rušenje u stajanju i hodanju i mučnina, prenosi portal Stetoskop. Kada traje kratko i nije praćena ozbiljnijim simptomima, poput mučnine ili drhtavice, vrtoglavica nije razlog za pretjeranu brigu. Ali, ako je vrtoglavica učestala, onda treba da se obavi pregled i pronađe njen uzrok. Vrtoglavica može da ukaže na mnoge lakše probleme, ali i na ozbiljnije zdravstvene poremećaje.

Vrtoglavica nije bolest. To je stanje koje može izazvati više od 300 uzroka. Najčešći su: položajna vrtoglavica, upala vestibularnog nerva, Meniereova bolest, tumor slušnog nerva, poremećaji protoka krvi u mozgu, promjene tkiva vratne kičme, povrede, prekomjerna naprezanja mišića, starije životno doba, napetost, stresna vrtoglavica i dr.

Simptomi

Osobe koje imaju vrtoglavicu najčešće opisuju poremećaj ravnoteže na dva načina: kao osjećaj okretanja oko glave ili u glavi, ili kao gubitak orijentacije u prostoru.

Smetnje se pogoršavaju okretanjem glave i promjenom položaja tijela, a često su praćene poremećajem sluha i šumom u uhu i mučninom. Specifični poremećaji su kretanje i bježanje predmeta pred očima ili osjećaj okretanja vlastitog tijela u prostoru, zatim osećaj gubljenja u prostoru, propadanja, uzdizanja i zanošenja u stranu ili naprijed – nazad.

Kod vrtoglavica iazavanih bolestima unutrašnjeg uva (otogenih vrtoglavica), predmeti koje gledamo vrte se vodoravno od bolesnog prema zdravom uhu, a ravnoteža je poremećena kod bolesnog uva. Nespecifični poremećaj ravnoteže ili lažna vrtoglavica karakteriše se svjetlećim zvjezdicama ili mračenjem pred očima (omaglica), nesvjesticom, osjećajem punoće i pritiskom u glavi i ušima. Najčešći im je uzrok kratkotrajni izostanak ili smanjeni protok krvi u mozgu ili u vratu.

Najčešće se javlja položajna vrtoglavica

Izaziva je neprimjeren pokret ili položaj glave, pri ležanju, okretanju u postelji ili zabacivanju glave unazad. Traje svega minut ili kraće, a može biti praćena ritmičnim treperenjem očiju dok sluh ostaje očuvan. Može se pojavljivati svakih nekoliko dana, ali i nakon nekoliko meseci.

Upala vestibularnog nerva

Napad žestoke vrtoglavice traje nekoliko dana, a zatim postupno popušta kroz nekoliko nedjelja. Iako uzrok poremećaja i mjesto oštećenja nijesu dokazani, većina ljekara smatra da je riječ o upali živca vestibuluma labirinta unutrašnjeg uva.

Meniereova bolest

Radi se o poremećaju mikrocirkulacije u unutašnjem uvu. Bolest se karakteriše iznenadnim napadima vrtoglavice, koji mogu trajati od nekoliko minuta do nekoliko sati. Napad može biti tako žestok da bolesnik mora da legne. Žestoka vrtoglavica obično je kratkotrajna. Prate je muka, povraćanje, šum u uvu, gubitak ravnoteže, nekada diplopije (duple slike).

Tumor slušnog živca

Karakteriše se stalnom vrtoglavicom čija se izraženost može mjeriti. Drugi znaci koji ukazuju na tumor su oštećenje sluha i poremećaji funkcije drugih nerava mozga.

Otkrivanje bolesti

U dijagnostici uzroka vrtoglavice učestvuju stručnjaci raznih specijalnosti: otoneurolog, neurolog, neurotraumatolog, fizijatar i kod dece neuropedijatar.

Od neprocjenjive je važnosti opis oboljelog o prirodi vrtoglavice, o njegovom radnom mjestu, aktivnostima neposredno prije napada, mogućim povredama glave i vrata i hroničnim bolestima. Postavljanje tačne dijagnoze omogućava niz dijagnostičkih postupaka: od pregleda oba uva, nosa, ždrijela i grkljana, preko neurološkog i očnog pregleda, nalaza fizijatra ili ortopeda, pretraga srca i krvnih sudova, pa sve do psihijatrijskog ispitivanja. Nakon što se utvrdi uzrok, određuje se način liječenja.

Prva pomoć kod vrtoglavice

Osobu koja ima napade vrtoglavice prvo treba smiriti i oprezno staviti u najzgodniji položaj za glavu. U protivnom može pasti i povrijediti se. Tegobe se ublažavaju strogim mirovanjem zatvorenih očiju i hladnim oblozima, a po potrebi uzimanjem sredstava za smirenje i onih protiv povraćanja. Nikotin, alkohol i crna kafa najstrože su zabranjeni, a prvih 24 sata treba uzimati neslanu hranu. Korisno je postupno opuštanje mišića uz ispravno disanje, psihičko opuštanje, masaža glave i vrata.


Najčitanije iz sekcije Ljepota i zdravlje