Mediji u Italiji i Engleskoj javljaju da je pitanje sata ili dana kada će Čelsi dati zeleno svjetlo (uz određeno finansijsku nadoknadu) da Mauricio Sarinapusti klupu londonskog kluba i preuzme Juventus. To će biti još jedan povratak u Italiju, nakon Antonija Kontea (preuzeo Inter).
Ako ne bude neočekivanih obrta, Sari i Konte se vraćaju u domovinu nakon što su obojica posljednje trenersko iskustvo imali u Premijer ligi, i to u istom klubu.
Konte je vodio Čelsi dvije sezone, od 2016. do 2018. godine i osvojio titulu 2017. Međutim, smijenjen je prošlog ljeta, a samo dan kasnije naslijedio ga je sunarodnik Sari, koji je protekle sezone Čelsiju donio trijumf u Ligi Evrope, i to bez poraza.
Sari, bivši trener Napolija, će preuzeti Juventus, posljednji klub koji je u Italiji vodio Konte, sa uspjehom, osvojivši tri Skudeta i Superkup Italije. Imena ova dva trenera vraćaju sjećanja i navijačima Areca, u kome su Konte i Sari, interesantno, radili u istoj sezoni, u Seriji B.
I to u famoznoj sezoni 2006/2007, jednoj od najjačih drugoligaških nadmetanja u istoriji fudbala u Italiji, zbog učešća Juventusa (nakon što je izbačen iz Serije A zbog “kalćopolija”), Napolija, Đenove i Bolonje. Arecu je, praktično, u toj konkurenciji bilo nemoguće da se bori za ulazak u prvu ligu, ali je opstanak izgledao izvjestan, bez obzira na šest oduzetih bodova u startu zbog “kalćopolija”, imajući u vidu da je ekipa godinu dana ranije bila sedma u Seriji B.
U toj sezoni je Konte na klupi Areca debitovao kao prvi trener, ali je imao očajan start sezone - pet remija i četiri poraza, pa je već 31. oktobra 2006. godine bio smijenjen. Na njegovo mjesto je stigao Sari, nekoliko mjeseci nakon što je podnio ostavku u Peskari. Imao je nešto bolje rezultate od Kontea, računajući i remi od 2:2 u gostima protiv Juventusa koji je vodio Didije Dešam, a bio je blizu i podviga u četvrtfinalu Kupa Italije protiv Milana, koji je četiri mjeseca kasnije osvojio Ligu šampiona.
I pored lijepe igre, a zbog šest bodova kazne, Areco nije uspijevao da se udalji sa začelja tabele, pa je 13. marta 2007. godine Sari smijenjen, a Konte vraćen na klupu, više iz očaja nego ubjeđenja da će biti bolje.
Nakon tri poraza u prva četiri kola, Konteova ekipa je počela da bilježi bolje rezultate, ali nije uspjela da izbjegne ispadanje, koje je bilo defnitivno nakon pobjede Specije protiv Juventusa, koji je tog dana igrao sa drugim, podmlađenim timom, što je jako naljutilo Kontea.
Prije više od decenije u drugoj ligi Italije, a danas među najtraženijim trenerima Evrope...
Bonus video:
