Barselona je odbacila optužbe svog bivšeg potpredsjednika Emilia Rusanda koji je u radijskom intervjuu rekao kako je "neko stavio ruku u blagajnu" prilikom angažovanja kompanije za upravljanje društvenim mrežama.
"Nakon teških optužbi koje je jutros iznio gospodin Rusand u intervjuima medijima, Barselona kategorički odbacuje bilo kakav čin koji bi se kvalifikirao korupcijom. Zbog toga zadržava pravo na pokretanje pravnog postupka", navela je Barselona.
U februaru su mediji izvijestili da je kompanija "I3Venture", koju je Barselona angažovaka za komunikaciju preko društvenih mreža, stvarala lažne profile preko kojih je pisala negativne komentare o protivnicima predsjednika Đosepa Marije Bartomeua, uključujući kandidata za predsjedničke izbore Víktora Fonta, ali i Lea Mesija, koji odugovlači s produženjem ugovora.
Rusand je u srijedu u razgovoru za Radio Katalonija rekao kako je on bio u odboru nadležnom za račune te kompanije, ali su oni bili razdijeljeni kako bi se "izbjegla interna kontrola".
U petak ga je Radio Katalonija upitala smatra li da je "neko stavio ruku u blagajnu" na što je potvrdno odgovorio.
"Kada platiš milion eura za nešto što vrijedi 100.000 eura. Ne znam ko je to bio, ali moguće je", rekao je.
Kompanija "I3Venture" je bila zadužena za praćenje sadržaja na društvenim mrežama, odnosno trebala je da prati što se piše i objavljuje o Barseloni, te istovremeno da uljepšava imidž kluba preko društvenih mreža. Račun od milion eura kojeg je izdala za svoje usluge bio je navodno podijeljen na manje račune od po 200.000 eura.
"To oko društvenih mreža je prljav posao. Vjerujem da je neko uzeo novac, premda ne vjerujem da je to bio netko iz uprave. Sada je otvorena istraga koja će reći što se dogodilo. Bartomeu to zna", rekao je Rusand.
Predsjednik Bartomeu je u srijedu smijenio Rusanda, koji je dan kasnije sa još petoro članova uprave Barselone nezadovoljnih potezima predsjednika podnio ostavku, čime je uprava ostala na 13 članova od ukupno 19.
Bonus video:
