Arsenal je sinoć u utakmici 17. kola Premijer lige na svom terenu dočekao Vest Hem i nakon preokreta slavio 3:1. Utakmicu je s tribina pratio legendarni trener ekipe iz Londona Arsen Venger, kojem je to bio prvi dolazak na neki od Arsenalovih mečeva u posljednje četiri godine.
Posljednji put Venger je na "Emiratesu" bio u junu 2018, tada još u ulozi Arsenalovog trenera. Bila je to posljednja domaća utakmica ekipe te sezone, a Venger se od navijača oprostio pobjedom 5:0 protiv Barnlija. Ispraćen je pjesmom.
Nije Venger imao namjeru da ode iz Arsenala krajem te sezone, već je na to bio primoran. Rastanak s klubom u kojem je bio menadžer od 1996. do 2018. godine opisao je kao "nepravedan, težak i brutalan", te je rekao da ga u klubu dugo neće vidjeti. Juče je došao i ponovno slušao kako mu navijači pjevaju i skandiraju.
Venger je Arsenal vodio do 17 titula u svim takmičenjima.
Nezaboravna za navijače kluba bila je titula Premijer lige iz sezone 2003/2004. u kojoj je Arsenal do pehara stigao bez ijednog poraza.
Bonus video:
