Novo veče mundijalskih kvalifikacija donijelo je još jedan senzaconalan rezultat - Kosovo je "osvojilo" Geteborg i pobjedom nad Švedskom (1:0) napravilo ogroman korak ka jednom od prva dva mjesta u grupi.
Heroj ove selekcije bio je Fisnik Aslani koji je u 32. minutu šokirao "Ulevi" stadion i zvijezde domaćina poput Aleksandera Isaka, Viktora Đekereša, Lukasa Bergvala...
Kosovo pred dva odlučujuća meča u novembru drži drugo mjesto na tabeli sa sedam bodova, tri manje od lidera Švajcarske, a četiri više od Slovenije, šest od najvećeg razočaranja kvalifikacija Švedske.
Ekipu Franka Fode do kraja očekuje meč sa Slovenijom u gostima i Švajcarskom kod kuće.
Za razliku od fudbalera Kosova njihove komšije iz Sjeverne Makedonije pokvarile su sve dobro do sada - momci Blogoja Milevskog nakon velikog boda protiv Belgije u gostima sada u Skoplju nisu uspjeli da savladaju Kazahstan (1:1).
Pred odlučujuće mečeve u grupi J prva je Belgija sa 14 bodova iz šest mečeva, Makedonci imaju 13 uz utakmicu više, a Vels (koji je takođe odigrao šest utakmica) 10.
Kada je u pitanju grupa A sve je izvjesnije da će Njemačka i Slovačka u posljednjem kolu odlučiti ko direktno putuje na Svjetsko prvenstvo 2026, a ko ide u baraž.
Obje selekcije imaju po devet bodova, a do novih pobjeda su stigle večeras - Njemačka je uz dosta muke golom Nika Voltemadea srušila Sjevernu Irsku u gostima (1:0), dok su Slovaci biloi bolji od Luksemburga (2:0).
Najljepši meč večeri odigrali su Island i Francuska, a nakon 90 minuta borbe u Rejkjaviku bilo je 2:2. Domaćin je poveo golom Viktora Palsona, "trikolori" preokrenuli preko Kristofera Nkunkua i Žan-Filipa Matete, da bi konačan rezultat postavio Kristijan Hlinson.
Bonus video:
