NBA

San Antonio u krizi, Majami preskočio Boston

Nikola Peković je protiv Majamija odigrao samo tri minuta i 23 sekunde, imao je jedan promašen šut iz igre i jedan skok.
0 komentar(a)
Lebron Džejms, Foto: Beta AP
Lebron Džejms, Foto: Beta AP
Ažurirano: 02.04.2011. 08:40h

Iako je i dalje najbolja ekipa lige, San Antonio je u velikoj krizi, jer je u Hjustonu, nakon produžetka, doživio šesti uzastopni poraz (119:114). Tako negativnu seriju Sparsi nisu imali u posljednjih 14 godina, pošto su šest poraza u nizu zabilježili od 10. do 20. aprila 1997. godine. Lejkersi su sada samo na pobjedu i po zaostatka na Zapadu.

“Sad će se pokazati kakvog smo “materijala”, koliko možemo kad je najteže. Vidjećemo da li smo vrijedni igara koje smo prižali ove sezone”, kaže trener San Antonija Greg Popovič.

U pobjedi Hjustona doprinijelo je čak sedam igrača sa dvocifrenim poenterskim učinkom, a predvodio ih je Kevin Martin sa 33 poena. U poražnom timu Toni Parker je zabio 31 koš, uz šest asistencija, Manu Đinobili je dodao 23 poena, baš kao i Tim Dunkan koji je sakupio i 13 skokova.

Poeni su bili dobro raspoređeni i u redovima Lejkersa, koji su savladali Jutu 96:85, iako je domaćin sredinom druge četvrtine vodio sa 17 poena razlike (41:24). Pet igrača sa dvocifrenim učinkom predvodio je Kobi Brajant koji je upisao 21 poen, po 16 koševa dodali su Pau Gasol i Lamar Odom, dok je bivši igrač Džezera Derik Fišer stao na 15. Kod domaćina je Si Džej Majls je ubacio 24 koša, sedam više od Ala Džefersona.

Jedini meč Istoka i Zapada odigrali su Minesota i Majami, koji je sigurnom pobjedom (111:92) iskoristio novi poraz Bostona (od Atlante) da od Seltiksa preuzme drugo mjesto isteočne obale. Naravno, Majami je do pobjede predvodio trio zvijezda - Dvejn Vejd je ubacio 32 koša, Lebron Džejms je dodao 27 i 10 asistencija, dok je Kris Boš imao učinak od 24 poena i 11 skokova. Nikola Peković je protiv Majamija odigrao samo tri minuta i 23 sekunde, imao je jedan promašen šut iz igre i jedan skok.

Rezultat: Orlando – Šarlot 89:77 (Hauard 26 p, 14 sk – Kaningam 21 p), Filadelfija – Nju Džersi 115:90 (Jang 22 p, Brand 21 p – Rajt 15 p, 11 sk), Vašington – Klivlend 115:107 (Bleč 36 p 19 sk, Mekgi 25 p, Kroford 21 p, 10 sk, 11 as – Sešns 26 p, Hikson 21 p, 10 sk, Dejvis 10 p, 11 as), Indijana – Milvoki 89:88 (Grendžer 17 p, Hibert 15 p, 11 sk – Dženings 20 p), Detroit – Čikago 96:101 (Hemilton 30 p – Rouz 27 p), Nju Orleans – Memfis 93:81 (Lendri 19 p – Rendolf 28 p, 10 sk, M. Gasol 13 p, 10 sk), Atlanta – Boston 88:83 (Kroford 20 p, Horford 16 p, 15 sk, Pačula 15 p, 10 sk), Minesota – Majami 92:111 (Vebster 22 p – Vejd 32 p, Džejms 27 p, 10 as, 6 sk, Boš 24 p, 11 sk), Hjuston – San Antonio 119:114, nakon produžetka (Martin 33 p, Skola 21 p, 14 sk, Hejs 10 p, 12 sk – Parker 31 p, Dankan 23 p, 13 sk), Sakramento – Denver 90:99 (Garsija 17 p, Dalembert 10 p, 12 sk – Felton 17 p, Hilario 12 p, 12 sk), Portland – Oklahoma 98:91 (Oldridž 32 p – Djurent 25 p, 11 sk), Finiks – LA Klipers 111:98 (Hil 19 p, Vorik 17 p, 10 sk – Gordon 21 p, Grifin 20 p, 13 sk), Juta – LA Lejkers 85:96 (Majls 24 p, Džeferson 17 p, 10 sk – Brajant 21 p).