NBA

Lejkersi u finišu slomili otpor Portlanda

Nikola Peković je u porazu Minesote od Sakramenta postigao dva poena za skoro 20 minuta koliko je proveo na parketu. Imao je i tri skoka i blokadu, kao i tri izgubljene lopte.
73 pregleda 0 komentar(a)
Lejkers - Portland, Foto: Beta AP
Lejkers - Portland, Foto: Beta AP
Ažurirano: 21.03.2011. 08:43h

Los Anđeles Lejkersi su u “Stejpls centru” savladali Portland 84:80 i upisali 12. pobjedu u posljednjih 13 utakmica u ligi. Gosti su u posljednju četvrtinu ušli sa četiri poena prednosti, ali je Kobe Brajant predvodio šampiona do pobjede sa 22 poena, od čega je 10 postigao u posljednjoj četvrtini. U posljednja tri minuta utakmice Derek Fišer je ukrao dvije lopte, a 10 sekundi prije kraja postigao koš za 50. pobjedu "jezerdžijama" u ligi.

Lamar Odom je dodao 16 poena i 11 skokova, a dabl-dabl učinak imao je i Pau Gasol sa 14 poena i 13 skokova.

Lejkersi su protiv Portlanda igrali bez startnog centra Endrjua Bajnama, koji je suspendovan na dvije utakmice zbog grubog prekršaja nad košarkašem Minesote Majklom Bizlijem prije dva dana.

U ekipi Portlanda, koji je prekinuo niz od tri pobjede, najefikasniji je bio Nikolas Batum sa 25 poena, od kojih je 22 postigao u prve tri četvrtine.

Dalas je Golden Stejtu nanio četvrti uzastopni poraz (101:73). Maverikse su do pobjede predvodili Dirk Novicki sa 20 i Predrag Stojaković sa 17 poena. Stojaković se na teren vratio poslije pauze od šest utakmica zbog povrede vrata, a tokom utakmice postigao je pet trojki iz osam pokušaja. U poraženom timu Monta Elis bio je najefikasniji sa 18 poena.

Sakramento je bio bolji od Minesote (127:95) i zabilježio je tek 17. pobjedu u sezoni. Samjuel Dalember bio je najbolji u ekipi Sakramenta sa 26 poena i 17 skokova, a Markus Tornton dodao je 23 poena.

Luk Ridnur postigao je 22 poena u timu Minesote, koja je veći dio utakmice igrala bez najboljeg igrača Kevina Lava, koji je povrijedio prepone u drugoj četvrtini, pa su Timbervulvsi doživjeli četvrti uzastopni poraz. Crnogorski reprezentativac Nikola Peković postigao je dva poena za skoro 20 minuta koliko je proveo na parketu. Peković je imao i tri skoka i blokadu, kao i tri izgubljene lopte.

Rezultati: Vašington - Nju Džersi 98:92 (Vol 26 p - Lopes 21 p, 10 sk, Hamfris 18 p, 17 sk), Atlanta - Detroit 104:96 (Horford 18 p, 10 sk - Staki 22p, Monro 17 p, 10 sk), Milvoki - Njujork 100:95 (Delfino 30 p, 11 sk, Dženings 14 p, 11 s, 9 as - Stodemajer 25 p, 11 sk, Entoni 23 p), Minesota - Sakramento 95:127 (Ridnur 22 p - Dalambert 26 p, 17 sk), LA Klipers - Finiks 99:108 (Kaman 21, 11 sk - Neš 23 p, 13 as, Gortat 17 p, 13 sk), Oklahoma Siti - Toronto 93:95 (Harden 23 p, Vestbruk 22 p - Barnjani 23 p), Hjuston - Juta 110:108 (Martin 34 p, Louvri 28 p, 11 sk, 10 as - Milsap 35 p, 10 sk, Džeferson 17 p, 19 sk), Dalas - Golden Stejt 101:73 (Novicki 20 p - Elis 18 p, Li 10 p, 12 sk), LA Lejkers - Portland 84:80 (Brajant 22 p, Odom 16 p, 11 sk, Gasol 14 p, 13 sk - Batum 25p).