Košarkaši Mornara su izgubili 20. put u sezoni, trener Mihailo Pavićević nije imao mnogo toga da zamjeri svojoj ekipi koja je pokazala više u ovih 40 minuta nego u mnogim mečevima u AdmiralBet ABA ligi.
Na kraju je Spartak u „Topolici” slavio 76:66.
„Svaki poraz je težak, pogotovo u situaciji u kojoj se mi nalazimo. Na kraju su presudili kvalitet i iskustvo. Ono što smo mi greškama pružili, oni su objeručke prihvatili i slavili. Želio bih da čestitam mojim igračima na 30 minuta dobre igre, kada to kažem govorim o prvih 15 minuta prvog poluvremena”, rekao je Pavićević i dodao:
NE PROPUSTITE
„Kod rezultata 36:23, na pet minuta prije kraja smo pali u koncentraciji, nismo dali nijedan poen, a oni su napravili seriju 11:0 iz naših grešaka u odbrani i vratili se u igru. Bilo je dobrih momenata u drugom dijelu, napravili smo sedam razlike, ali ove godine imamo problema sa iskustvom igranja ABA lige. Umjesto da čuvamo mudro prednost i da igramo pametno, umorimo se da napravimo razliku, a onda za minut-dva sve prospemo”.
Mornar je posljednji, ima samo pobjedu u 21 utakmici.
„Šta je tu je, nema dalje. Ovih 30 minuta koji su bili jako dobri protiv kvalitetne ekipe me raduje, pa do kraja sezone možemo da budemo optimisti. Problem je kratka rotacija, pali smo posljednjih pet minuta prvog poluvremena i posljednja tri minuta utakmice. U takvim situacijama se gubi koncentracija, a to je Spartak kaznio”, zaključio je Pavićević.
Bonus video:
