PROFESIONALNI BOKS

Nokaut je zagarantovan: Bronzani Bombarder napada King Konga

Dva nokdauna oba borca i nokaut obilježila su prethodnu pobjedu Vajldera nad Ortisom
1970 pregleda 0 komentar(a)
Vajlder brani pojas, a Ortis se bori za ostvarenje sna svih boksera, WBC pojas, Foto: LAS VEGAS SUN
Vajlder brani pojas, a Ortis se bori za ostvarenje sna svih boksera, WBC pojas, Foto: LAS VEGAS SUN

Hram boksa u Las Vegasu „MGM Grand arena” u ranim jutarnjim časovima u nedjelju biće poprište još jednog velikog spektakla. Zagarantovan, makar ako je mjerilo prvi okršaj dvojice sjajnih nokautera teške kategorije Amerikanca Donteja Vajldera i Kubanca Luisa Ortisa u borbi za WBC pojas prvaka svijeta.

Njihov prvi okršaj u Bruklinu prije godinu i po pripao je šampionu Vajlderu, prekidom u 10. rundi, mada ga je prethodno od prvog poraza spasao sudija pravovremenim brojanjem, a potom i gong.

Tek, oba borca su do prekida u 10. rundi bila u nokdaunu, prvo Ortis u sedmoj rundi, i kada se očekivalo da će se borba završiti preokretom u njegovu korsit, Vajlder je ipak dobio meč. Tačnije tuču, kakva se nije gledala od epohe Alija i Frejzera u teškoj kategoriji.

- Tačno je da sam stariji nego u prvom okršaju, ali sam promijenio ciklus priprema i ishrane i spreman sam. Sigurno mi se neće desiti da opet ostanem bez snage i jednostavno zaspim od umora, zbog kojeg nisam prvi meč riješio u svoju korist. Sada ću ga definitivno nokautirati i ostvariti snove da postanem šampion - kazao je 40-godišnji Kubanac sa nadimkom King Kong, kojem je taj poraz u martu 2018. od Bronzanog Bombardera bio prvi u karijeri.

Od tog momenta nokauter iz Kube je dobio čak tri borbe i došao je do 31 pobjede, 26 nokautom. Za razliku od Ortisa, Vajlder, koji je juče napunio 34 godine, nema poraza, samo remi u 42 profi meča.

I to prvi nakon Ortisa, kada mu je protiv Tajsona Fjurija poklonjen remi. I on se uglavnom uzda u razorne udarce i čak je 40 pobjeda dobio nokautom.

- Biće to novi rat, koji će se sigurno završiti nokautom. Jeste Ortis već veteran, ali i izuzetno opasan borac. Bokser je koji jednim udarcem može da riješi meč, i zato osim mene niko iz top 10 na svjetskoj rang- listi nije mu dao priliku. Svi su ga izbjegavali, a ja eto već drugi put ću boksovati sa njim. I naravno, uspavaću dedicu, jer meni su za to potrebne svega dvije sekunde neopreznosti rivala - naglasio je Vajlder.