Suvlasnik rekorda po broju etapnih pobjeda na „Tur d’ Fransu”, 38-godišnji britanski biciklista Mark Kavendiš, morao je da odustane tokom osme etape najpoznatije biciklističke trke na svijetu, nakon pada 64 kilometra prije cilja u Limožu.
Samo dan nakon što je osvojio 2. mjesto u 7. etapi i pokazao da može biti konkurentan u sprinterskim završnicama za svoju 35. pobjedu na „Turu”, kojom bi „pobjegao” legendarnom Belgijancu Ediju Merksu, Kavendiš je pao vozeći se u glavnoj grupi i povrijedio desno rame.
Doktorska ekipa je vrlo brzo došla do Britanca, koji se držao za rame, a potom i za glavu, što nije bio dobar znak.
Kada su mu povezali desno rame i odvezli ga vozilom hitne pomoći, postalo je jasno da jedan od najboljih sprintera ikada neće više nastupati na svom oproštajnom „Turu”.
U etapi od Liburna do Limoža, slavio je Danac Mads Pedersen, ispred Belgijanaca Jaspera Filipsena i Vuta van Aerta.
U generalnom poretku nije bilo promjena, prvi je branilac titule Jonas Vingegord, sa 25 sekundi prednosti nad šampionom iz 2020. i 2021. godine, Tadejem Pogačarom.
Bonus video:
