NOVLJANKA PREBRODILA KVALIFIKACIJE

Danka Kovinić u glavnom žrijebu Praga, sa Nikulesku za Top 100

U 1. kolu protivnica će joj biti Rumunka Monika Nikulesku, trenutno 61. igračica svijeta
1 komentar(a)
Danka Kovinić, Foto: Beta/AP
Danka Kovinić, Foto: Beta/AP
Ažurirano: 27.04.2015. 12:27h

Trećom pobjedom za 48 sati, Danka Kovinić je izborila plasman u glavni žrijeb WTA turnira u Pragu.

Novljanka je u posljednjem kolu kvalifikacija savladala 15-godišnju češku nadu, Marketu Vondroušovu sa 7:5, 7:6.

Kovinićeva je preživjela dvije set lopte u prvom dijelu igre, a u drugom je vodila 4:1, ali je tek taj-brejku iskoristila četvrtu meč loptu.

Ovom pobjedom, Danka je zaradila 19 WTA bodova, pa će narednog ponedjeljka imati minimum 583.

To bi joj danas bilo dovoljno za 101. mjesto na WTA listi, pa joj je za ulazak u Top 100 neophodna još jedna pobjeda.

U 1. kolu protivnica će joj biti Monika Nikulesku, trenutno 61. igračica svijeta.

Njih dvije su se sastale lani u brazilskom Florijanapolisu, a 27-godišnja Rumunka je slavila sa 6:3, 6:1.

Pobjednica tog meča će se sastati sa boljom iz duela Svetlana Kuznjecove i Šuaj Žang.

Turnir u Pragu igra se za nagradni fond od 250 hiljada dolara, a pobjednici će pripasti 43.000 i 280 WTA poena.