Alkaras, prvi Španac šampion Majamija: Rano je da opišem kako se osjećam; Rud: Karlos je tako dobar igrač

Rafael Nadal je pet puta igrao finale Mastersa u Majamiju, ali nikada nije podigao trofej.

Večeras je to uradio teniser za kojeg smatraju da će biti Rafin nasljednik - Karlos Alkaras.

Alkaras je u finalu savladao Kaspera Ruda 7:5, 6:4 i postao prvi Španac šampion Majamija.

"Rano je da opišem kako se osjećam. Osvojio sam prvi Masters u karijeri, imam nevjerovatan tim uz sebe. Čestitam Kasperu i njegovom timu. Definitivno ove godine može da uradi velike stvari. Zahvaljujem se i mojoj porodici i timu. Hvala Huanu Karlosu - došao je juče, želim da mu se zahvalim što je ostao uz mene u ovom važnom momentu za moju karijeru", kazao je Alkaras, koji će od sjutra biti 11. na ATP listi.

A Kasper Rud će biti sedmi što mu je najbolji plasman u karijeri.

"Čestitam Karlosu. Već sada si tako dobar igrač. Ako ovako nastaviš gledaćemo te ovdje mnogo godina. Vrijedno radiš, dobar si momak, ovo je dostignuće koje ste ti i tvoj tim zaslužili. Čestitam i mom timu", kazao je Rud tokom ceremonije.