Britanski teniser Endi Marej, osvajač tri grend slem titule, najavio je skori oproštaj od aktivnog igranja.
Marej ima 36 godina i vjerovatno to i ne bi bio problem da još 2019. nije operisao kuk.
I tada se nagađalo da bi mogao da se povuče, no veliki borac je uspio da "produži" karijeru barem još četiri i po godine.
Priznao je, međutim, da mu nije ostalo još puno nakon što je juče protiv Denisa Šapovalova u Dubaiju ostvario tek drugu pobjedu u 2024. godini.
Sjutra će igrati protiv Francuza Iga Ambera.
"Vjerovatno mi nije preostalo puno, ali daću sve od sebe u posljednjih nekoliko mjeseci, dok još igram", kazao je Marej.
Izgubio je čak pet finala Australijan opena - četiri od Novaka Đokovića, ali je dio propuštenog u Melburnu nadoknadio na Vimbldonu, koji je osvojio dva puta (2013, 2016), kao i na US openu, gdje je slavio 2012. godine.
Tri grend slem titule, iz ukupno 10 grend slem finala - dovoljno za status teniske legende.
"Još uvijek volim tenis, volim da igram, ali kako stariš postaje sve teže takmičiti se s mladim igračima i ostati u formi. Vjerovatno mi nije preostalo puno", istakao je momak iz Glazgova.
Svojevremeno je bio prvi igrač svijeta, a mnogim impozantnim brojkama juče je dodao još jednu - pobjeda protiv Šapovalova bila mu je 500. u karijeri na tvrdim podlogama.
Više od njega imaju samo Rodžer Federer (783), Novak Đoković (700), Andre Agasi (592) i Rafael Nadal (518).
"Tvrda podloga je najbolja za mene, a 500 pobjeda je puno i ponosan sam na to. Nema puno igrača koji su to postigli i super je doći do 500 prije nego što završim", zaključio je Marej.
Bonus video:
