ARID UKA SASLUŠAN

Frankfurtski napadač priznao ubistva

Arid Uka je priznao da su američki vojnici, na aerodromu u Frankfurtu, bili meta njegovog napada, rekao je ministar unutrašnjih poslova nemačke pokrajine Hese Boris Rajn.
0 komentar(a)
Ažurirano: 03.03.2011. 16:11h

''Mladić, star 21 godinu se izjasnio u prvom saslušanju'', rekao je danas u Vizbadenu Rajn.

Prema prvim saznanjima radi se o radikalnom islamisti, dodao je on.

Rajn je iznio i mogućnost da je napadač sam djelovao, pošto se povodom ubistva i ranjavanja američkih vojnika još nije oglasila nijedna teroristička organizacija.

Na arapskom uzviknuo ''Bog je veliki'' i počeo da puca

Njemačko federalno tužilaštvo preuzelo je istragu o jučerašnjem oružanom incidentu na jednom od najprometnijih evropskih aerodroma u kojem su povrijeđena dva američka vojnika.

Mladić je, noseći veću količinu municije, kako navodi nemački nedeljnik “Špigel” u onlajn izdanju, ušao u autobus sa američkim vojnicima i otvorio na njih vatru iz pištolja.

Svjedoci ovog krvavog događaja kažu da je napadač, prije nego što je počeo da puca, na arapskom uzviknuo ''Bog je veliki'', prenosi ''Miteldojče cajtung''.

Činjenica da je on bio naoružan u blizini aerdoroma, koji je najfrekventniji njemački aerodrom, i polazna tačka za mnoge američke vojnike na putu za Ameriku ili za američke baze u drugim zemljama, predstavlja nešto što nije slučajnost.

Još uvijek se ne zna da li je Arid Uka izveo ovaj napad samoinicijativno ili je dio neke veće grupe ili šire akcije koja je ovim napadom počela.

Mladi Arid Uka je, prema izjavama njegovih rođaka, bio vjerni musliman, koji je odrastao u Njemačkoj i, najvjerovatnije, radio na aerodromu u Frankfurtu.

Arid Uka rodio se i odrastao u Njemačkoj gdje su se njegovi roditelji preselili prije oko 40 godina, rekao je njegov 70-godišnji ujak Redžep Uka sa Kosova u razgovoru za AP.

Ujak je dodao da je Arid duboki muslimanski vjernik, i da mu je đed bio imam u selu Žabar, kod Kosovske Mitrovice.

AP je razgovarao i sa Muratom Ukom, koji se predstavio kao otac napadača, i rekao da zna samo to da njegov sin Arid danas nije došao na posao.

Aerodrom Frankfurt je odbio da potvrdi ili demantuje da je osumnjičeni njegov zaposleni.

Komanda Ratnog vazduhoplovstva SAD za Evropu je potvrdila da su dvojica pripadnika tih snaga poginula u oružanom napadu na aerodromu u Frankfurtu, a dvojica su ranjena, javile su agencije.

Poginuli su vozač autobusa i jedan putnik, treća osoba je teško ranjena, a četvrta lakše.

Postoje jasne indicije o povezanosti napadača sa islamističkim krugovima u Njemačkoj, a u Americi se strahuje i od toga da bi mladić mogao biti dio jedne terorističke ćelije i da bi moglo biti još napada na američke ciljeve u Njemačkoj.

Istražena i Ukina aktivnost na Internetu

U međuvremenu, njemački istražni organi ispituju internet stranicu mladića na kojoj je on, skoro bez prikrivanja, iznosio svoju islamističku opredijeljenost i na kojoj mu je ''idol'' islamski osvajač Halid bin Valid.

Internet stranice koje je posjećivao su islamski ''obojene'' i, kako se saznaje, bio je na stranicama ''Vladavina islama'', a ima i indicija da je aktivno igrao kompjuterske igrice.

Osim toga, ubica je, izgleda, u avgustu prošle godine, učestvovao u jednoj ''onlajn'' anketi i na pitanje koje bi mu oružje najbolje odgovaralo - dao odgovor snajper Baret M82.

Arid Uka do sada nije pao u oči nadležnim sigurnosnim službama u Njemačkoj, ali je, možda, kako se smatra, riječ o osobi, koja je bila na margini posmatrane grupe.

Uka je, možda, čak posmatrao kako ide transport američkih vojnika, pa tek onda reagovao. U svakom slučaju, sumnjivo je i samo to što se uopšte u blizini aerodroma pojavio sa oružjem.

Nakon napada ovog mladića, na aerodromu u Frankfurtu je bio dat signal za ''teroralarm'', javljaju mediji, koji postavljaju pitanje da li se radi o usamljlenom napadaču ili članu neke terorističke grupe.

Galerija