U drugom krugu izbora za predsjednika Slovenije, koji će biti održan 13. novembra, suočiće se bivši desničarski ministar inostranih poslova Anže Logar i pravnica Nataša Pirc Musar. Mada je uloga predsjednika Slovenije uglavnom ceremonijalna, smatra se da će ishod izbora za predsjednika odraziti odnos podrške birača liberalnim i proevropskim političkim snagama sa jedne strane i populističkim euroskeptičnim strankama sa druge.
U prvom krugu glasanja, održanom u nedjelju, Logar je osvojio 34 odsto glasova dok je za Pirc Musar glasalo 26,88 odsto birača, pokazali su preliminarni rezultati.
Logar, 46, član je evroskeptične antiimigrantske Slovenačke demokratske partije (SDS) bivšeg premijera Janeza Janše, koji je izgubio na parlamentarnim izborima u aprilu od zeleno-lijevog Pokreta sloboda novog premijera Roberta Goloba.
Tokom kampanje, 46-godišnji Logar je nastupio kao nezavisni kandidat nastojao je da odbaci svoj populistički imidž obećavajući da će biti predsjednik za “okupljanje” ljudi iz cijelog političkog spektra.
Pirc Musar, koja je obećala da će biti prva žena na čelu države je 54-godišnja bivša televizijska voditeljka koja je sada uticajna pravnica i aktivistkinja za ljudska prava, vladavinu prava i aktuelizuje teme od društvenog značaja.
Međutim, Pirc Musar se tokom predizborne kampanje suočavala sa optužbama za unosne poslovne aktivnosti svog supruga u zemlji i inostranstvu.
Novi predsjednik Slovenije, članice Evropske unije i NATO-a, zamijeniće na toj dužnosti Boruta Pahora, bivšeg modela koji je služio dva mandata i u javnosti je često nazivan predsjednikom Instagrama zbog njegove aktivnosti na toj društvenoj mreži. Pobjeda Logara u drugom krugu mogla bi da se protumači kao neuspjeh Goloba koji je zbacio Janšu.
Bonus video:
