U Južnoj Africi i danas su nastavljene pljačke i paljenja zgrada i automobila, četvrti dan zaredom od odlaska u zatvor bivšeg predsjednika Džejkoba Zume koji je osuđen na 15 mjeseci zatvora zbog nepoštovanja suda.
Blokirani putevi i opustošeni tržni centri vide se na snimcima televizija iz provincije na istoku zemlje gdje Zuma služi kaznu i gdje su izbili prvi neredi koji su se proširili i na Johanesburg.
Na snimcima se vide ljudi koji trče u zapaljenu zgradu tržnog centra, dok drugi izlaze s kolicima punim robe.
Supermarket u mjestu, 30-ak kilometara od raskošne rezidencije koju je Zuma renovirao o trošku poreskih obveznika, opljačkan je jutros prije nego što je došla policija koja je upotrijebila gumene metke da bi rastjerala okupljene, a slična situacija je bila juče i u Johanesburgu.
Zapaljeni su kamioni duž glavnog puta u blizini Durbana, glavne luke Južne Afrike, kao i brojna vozila.
U Johanesburgu je tokom noći nastavljeno sa pljačkama, a djelovi autoputa su i jutros blokirani, navodi policija koja dodaje da je uhapšeno na desetine osumnjičenih.
Predsjednik Siril Ramafosa je sinoć ponovo pozvao na smirivanje situacije.
"Neki se nesumnjivo osjećaju povrijeđeno i bijesno, ali ništa ne opravdava ovakvo nasilje".
Zuma je u srijedu uveče otišao u zatvor na služenje kazne.
Ustavni sud Južne Afrike osudio ga je 29. juna na 15 mjeseci zatvora zbog nepoštovanja suda pošto je odbio da odgovara na pitanja komisije za borbu protiv korupcije u vrijeme svog mandata.
To je prvi put u istoriji Južne Afrike da je jedan bivši predsjednik osuđen na kaznu zatvora.
Zumi je tada naloženo da se prijavi policiji u roku od pet dana, a ukoliko to ne učini, biće uhapšen.
Zuma, predsjednik privredno najrazvijenije afričke zemlje od 2009. do 2018, optužen je za brojne slučajeve korupcije, reketiranje, prevaru, utaju poreza i pranje novca.
Bonus video:
