novi izvještaj

UN: Sjeverna Koreja nastavila da razvija nuklearni i program balističkih projektila, krši rezoluciju

Sjeverna Koreja je takođe pokazala povećane sposobnosti za brzo raspoređivanje, široku mobilnost na kopnu i moru i za poboljšanje otpornosti svojih raketnih snaga

2198 pregleda 0 komentar(a)
Rakete Sjeverne Koreje, Foto: Reuters
Rakete Sjeverne Koreje, Foto: Reuters

Sjeverna Koreja nastavila je da razvija svoj nuklearni i program balističkih projektila, kao i sposobnost da proizvede djelove nuklearnih uređaja kršeći rezolucije Savjeta bezbjednosti Ujedinjenih nacija (UN), saopštili su UN stručnjaci u novom izvještaju.

U januaru je Sjeverna Koreja ubrzala testiranja i demonstracije novih raketa kratkog i vjerovatno srednjeg dometa, koje koriste i balističke tehnologije i tehnologije navođenja, kao i tečna i čvrsta goriva.

U rezimeu izvještaja stručnjaci navode da je moguće da je testirana hipersonična bojeva glava za navođenje i manevarsko vozilo za ponovni ulazak.

Sjeverna Koreja je takođe pokazala povećane sposobnosti za brzo raspoređivanje, široku mobilnost na kopnu i moru i za poboljšanje otpornosti svojih raketnih snaga.

Pjongjang koristi sajber napade na imovinu kripto valuta za finansiranje svojih programa i nastavlja da traži materijal i tehnologiju u inostranstvu za svoje oružje.

Sjeverna Koreja je lansirala razne sisteme naoružanja tokom posljednjih mjeseci i zaprijetila da će ukinuti četvorogodišnji moratorijum na ozbiljnija testiranja oružja kao što su nuklearne eksplozije.

U januaru je zabilježeno rekordnih devet lansiranja projektila i testiranja hipersonične rakete koju razvija i rakete za lansiranja sa podmornice.

UN je prvobitno uveo sankcije Sjevernoj Koreji nakon njene prve nuklearne probne eksplozije 2006. godine i pooštrio ih kao odgovor na njeno dalje testiranje i sve sofisticiranije nuklearne i balističke programe.