SAD uvele sankcije jevrejskim kolonistima optuženim za napade na Palestince

Na Zapadnoj obali raste nasilje od početka rata između Izraela i Hamasa na pojasu Gaze, 7. oktobra

3863 pregleda 4 komentar(a)
Blinken, Foto: Reuters
Blinken, Foto: Reuters

Sjedinjene Američke Države (SAD) su objavile danas da su uvele sankcije jevrejskim kolonistima optuženim za napade na Palestince, u nastojanju da suzbiju nasilje u okupiranoj Zapadnoj obali.

"Stejt department danas uvodi novu politiku restrikcije viza protiv osoba osumnjičenih da su doprinijele podrivanju mira, bezbjednosti ili stabilnosti na Zapadnoj obali, posebno u činjenju nasilja prema Palestincima", rekao je državni sekretar SAD Entoni Blinken u saopštenju ocjenjujući to nasilje "neprihvatljivim".

Nije rekao koliko ljudi je pogođeno tim viznim restrikcijama koje se uvode i za njihove članove porodice.

Na Zapadnoj obali raste nasilje od početka rata između Izraela i Hamasa na pojasu Gaze, 7. oktobra.

Blinken je tokom posjete Izraelu prošlog četvrtka upozorio izraelskog premijera Benjamina Netanjahua o namjeri da uvede takve vizne restrikcije protiv izrelskih kolonista, rekao je jedan američki zvaničnik.

Blinken je pozvao Izrael da sudi ekstremističkim kolonistima optuženim za nasilje nad Palestincima na Zapadnoj obali.

SAD su i ranije osudile nasilje jevrejskih kolonista protiv Palestinaca na okupiranoj Zapadnoj obali i pozvale izrelske vlasti da to prekinu.

"Nastavljamo da razgovaramo sa izraelskim vođama da shvate da treba da preduzmu dodatne mjere da zaštite palestinske civile protiv napada ekstremista", dodao je Blinken u saopštenju.

On je takođe rekao da Palestinska uprava treba da učini više da spriječi palestinske napade na Izraelce.

"Kako Izrael tako i Paletsinska uprava imaju odgovornost da održe stabilnost na Zapadnoj obali", rekao je on.

Za mjesec dana najmanje 244 Palestinaca ubijeno je na Zapadnoj obali, od strane vojske ili izraelskih kolonista, prema Birou UN za koordinaciju humanitarnim pitanjima (OCHA).

Bonus video: