SJEĆANJEM PROTIV NESTANKA

Tragaju za djedom već 16 godina

Halit je 24. jula 1999. godine otišao na svoju posljednju vožnju. U mjestu Gornji Petrič u Peći mu se izgubio svaki trag
10 komentar(a)
Hajla, Hajla uspon, Foto: Aida Skorupan
Hajla, Hajla uspon, Foto: Aida Skorupan
14.02.2019. 08:07h

„Sjećanjem protiv nestanka, jer ljubav ne nestaje“, jedanaestoro unučadi rožajskog taksiste Halita Nurkovića, podržalo je ovog jula, šesnaestogodišnju potragu svojih majki za ocem, odnosno djedom kojeg poznaju samo iz priča.

Halit je 24. jula 1999. godine otišao na svoju posljednju vožnju. U mjestu Gornji Petrič u Peći mu se izgubio svaki trag. 

Šest njegovih kćeri, koje su rasute po cijelom svijetu, već  5.846 dana pokušavaju da pronađu te izgubljene tragove, a sa njima i očeve posmrtne ostatke. 

„Svaki od tih dana svaka od nas je uvijek i iznova doživljavala tatin nestanak kao da se desio baš tog dana. Neznanje o tome šta se tati dogodilo, kako je stradao i nemogućnost da ga sahranimo dostojanstveno, na mjestu na kojem je on to želio - pored groba naše majke, čine nam se ponekad strašnijim i od same činjenice da ga više nema“, rekla je Elsana Nurković, jedna od Halitovih kćeri.   

Ona, kao i ostalih pet sestara su pored bajki za laku noć, svojoj djeci pričale o djedu i na taj način oživljavale njegov osmijeh, pogled i zagrljaj čija toplina ih i kroz sjećanje tjera da ne odustanu od potrage za istinom.

Sa njihovim odrastanjem, kod jedanaestoro Halitovih unučadi rasla je i ljubav prema djedu, pa su kroz organizaciju i učešće u gradskoj trci „Tragom budućnosti“, poslali poruku da se „budućnost ne može ni oteti ni nestati, nasuprot brisanju i razaranju života“. 

Halit, istakla je ona na memorijalnom skupu, kao ni hiljade drugih koji su na prostorima bivše Jugoslavije prisilno nestali, neće i ne mogu biti zaboravljeni.

„Tu poruku želimo da pošaljemo institucijama i ljudima u regionu, a posebno onima koji imaju informacije koje mogu da pomognu u rasvjetljavanju sudbina svih nestalih na prostorima bivše Jugoslavije“, rekla je Elsana.

U okviru dvodnevnog sjećanja, koje je imalo međunarodni karakter i okupilo učesnike iz Crne Gore, Kosova, Bosne i Hercegovine, Srbije, Austrije, Njemačke, Holandije, Australije i drugih zemalja, održan je i treći memorijalni planinski maraton i pohod na Hajlu.

Maraton sjećanja istrčao i 73-godišnji starac

U kategoriji djevojčica u gradskoj trci prvo mjesto su podijelile Zara Badić i Lejla Sutović, dok je treće mjesto osvojila Sanida Nurković. Među dječacima najuspješniji je bio Ajdin Lukač. Drugo mjesto je osvojio Benjamin Muković, a treće Daris Badić.

U planinskom maratonu najuspješnija je bila Daliborka Davidović, ovogodišnja šampionka Crne Gore u olimpijskoj distanci. Pratile su je Zorica Krivokapić i Snežana Babović.

Prvo mjesto u kategoriji muškaraca je osvojio Ibrahim Ramić, drugo Veselin Petrušić, a treće Sani Badić.

Maraton je istrčao i sedamdesettrogodišnji Menduh Belegu sa Kosova, kao najstariji učesnik. Najmlađi učesnik je bio Anes Brđanin, koji je rođen u godini u kojoj je Halit nestao.