"dosegla nove vrhunce"

Rekorderka: Nasina astronautkinja u svemiru boravila 289 dana zaredom

Kristina Kouk je u oktobru oborila još jedan rekord izvođenjem prve isključivo ženske svemirske šetnje izvan ISS-a zajedno s astronautkinjom Džesikom Meir
2296 pregleda 2 komentar(a)
Džesika Meir (lijevo) i Kristina Kouk (desno) u oktobru ove godine, Foto: AP
Džesika Meir (lijevo) i Kristina Kouk (desno) u oktobru ove godine, Foto: AP

Američka astronautkinja Kristina Kouk u subotu je postala astronautkinja koja je najduže, 289 dana, u kontinuitetu boravila u svemiru, saopštila je NASA.

Stigavši na Međunarodnu svemirsku stanicu (ISS) 15. marta, ona je nadmašila rekord od 288 dana koji je postavila Pegi Vitson.

NASA je u tvitu čestitala Kouk koja je "dosegla nove vrhunce".

"To je divna stvar za nauku", rekla je Kouk za mrežu CNN sa ISS-a. "Vidimo drugi aspekt kako je ljudsko tijelo pogađa mikrogravitacija na duže razdoblje i to je uistinu važno za naš budući plan svemirskog leta prema Mjesecu i Marsu", dodala je.

Do trenutka kada će se vratiti na Zemlju u februaru, u svemiru će provesti 328 dana, samo 12 dana manje od rekorda penzionisanog astronauta Skota Kelija, postavljenog 2016.

Većina misija na ISS-u trajala je oko šest mjeseci.

Kouk je u oktobru oborila još jedan rekord izvođenjem prve isključivo ženske svemirske šetnje izvan ISS-a zajedno s astronautkinjom Džesikom Meir.

Za vrijeme boravka na dvije decenije staroj međunarodnoj stanici, Kouk učestvuje u naučnom istraživanju, održavanju stanice, informisanju te svemirskim šetnjama, izvještava NASA na svojoj internet stranici.