DOMINIRAO NA NEKIM PROGRAMIMA

Đukanović na TV-u bio tri puta više od ostalih kandidata

Agencija za elektronske medije objavila Izvještaj o medijskoj zastupljenosti predsjedničkih kandidata
75 pregleda 14 komentar(a)
Milo Đukanović, Foto: Boris Pejović
Milo Đukanović, Foto: Boris Pejović
Ažurirano: 31.01.2019. 10:10h

Novoizabrani predsjednik Milo Đukanović na televizijama je tokom kampanje dobio skoro tri puta više prostora od drugih predsjedničkih kandidata, pokazao je Izvještaj o medijskom predstavljanju tokom kampanje za izbor predsjednika koji je objavila Agencija za elektronske medije (AEM).

Monitoring AEM-a obuhvatio je 13 televizijskih stanica i 19 radio emitera, a izvještaj se odnosi na informisanje o aktivnostima kandidata kroz priloge i informacije, prvenstveno iz informativnog programa. Informacije se odnose na najave ili izvještaje sa promotivnih skupova, saopštenja kandidata ili izbornih štabova, izvještaje sa pres konferencija i druge priloge i izvještaje u kojima se u okviru informativnih emisija vrši direktno upućivanje na predizborne aktivnosti kandidata, njegove stavove ili mišljenja, te na predstavljanje kandidata kroz debate intervjue i druge posebne emisije, kao i političko oglašavanje.

Prema izvještaju, Đukanović je na televizijama za predstavljanje dobio vremenski prostor od 62 sata i 50 minuta, a slijedi ga kandidat dijela opozicije Mladen Bojanić koji je na televizijskom programu 13 stanica dobio ukupno 21 sat i 35 minuta. Predsjednik Prave Crne Gore Marko Milačić je na televizijskim programima dobio 15 sati i 15 minuta, a kandidatkinja SDP-a i Demosa Draginja Vuksanović 12 sati i pet minuta. Kandidat Vasilije Miličković se u televizijskom programu pojavljivao ukupno 13 sati i 43 minuta, predsjednik Stranke pravde i pomirenja Hazbija Kalač osam sati i 21 minuta, dok je najmanje bio predstavljen kanididat Srpske koalicije Dobrilo Dedeić koji je dobio pet sati i 47 minuta.

Na Javnom servisu najviše prostora dobio je Miličković, ukupno tri sata i 59 minuta, zatim Vuksanovićeva koji je bila na programu tri sata i 27 minuta. Bojanić je dobio prostor od dva sata i 30 minuta, dok je Đukanović na RTCG-u bio prisutan dva sata i 16 minuta, iako nije učestvovao ni u jednom od dva sučeljavanja predsjedničkih kandidata koje je emitovao Javni servis. Milačić je na Javnom servisu dobio dva sata i 49 minuta, Dedeić dva sata i 25 minuta, a Kalač dva sata i 22 minuta.

Bojanić je bio najviše zastupljen na Televiziji Vijesti, gdje je dobio osam sati i 17 minuta, iza njega je Vuksanovićeva koja je dobila tri sata i 23 minuta. Milačić je bio ukupno zastupljen sat i 13 minuta, Đukanović sat i pet minuta, a Miličković sa 35 minuta vremenskog prostora. Dedeić je na Televiziji Vijesti dobio pet minuta, a Kalač dva. Na Televiziji Pink prostor su dobili samo Đukanović i Bojanić, od čega je šef DPS-a imao ukupno 24 sata i 45 minuta, a Bojanić dva minuta.

Đukanović je dominirao na programu javnog emitera Televizije Nikšić, gdje je dobio pet sati i 19 minuta. Bojanić je na toj televiziji dobio sat i 11 minuta, Miličković sat i 23, Milačić 35 minuta, Vuksanovićeva dva, a Dedeić tri minuta, dok se Kalač nije pojavljivao u programu te televizije. U programu Televizije Budva, koja je takođe javni emiter, dominirao je Miličković sa četiri sata i 52 minuta, Milačić je imao ukupno tri sata i 26 minuta, dok je Bojanić dobio dva sata i 10 minuta programa. Đukanović je na toj televiziji dobio prostor od 36 minuta, a Dedeić sat i 22 minuta. Vuksanovićeva je na Televiziji Budva imala četiri minuta za predstavljanje a Kalač dva sata i 12 minuta. Najviše prostora u programu javnog emitera Televizije Pljevlja dobio je Milačić, ukupno dva sata i pet minuta, Bojanić je imao prostor od sat i 43 minuta, a Đukanović od 52 minuta. Dedeić je u programu Televizije Pljevlja bio prisutan sat i 46 minuta, Vuksanović sat i 36, Kalač sat i 52 minuta, a Miličković 21 minut. Na Televiziji Prva Đukanović je dobio 9 sati i 40 minuta, Bojanić 21 minut, Milačić i Vuksanović po 12 minuta, Miličković i Dedić po minut, dok se Kalač nije pojavljivao na programu te televizije.Đukanoviću na Anteni M pet sati, na Radiju Berane ni sekunda

Kada su u pitanju radio-stanice, najviše vremena Đukanović je dobio u programu Antene M, gdje je za reklame, intervjue i druge načine predstavljanja dobio pet sati i pet minuta. Na toj radio-stanici Bojanić je dobio 11 minuta, Vuksanović tri, Milačić minut, a Dedeić 26 sekundi. Kalač i Miličković nisu predstavljani na toj stanici. Đukanović nije bio medijski predstavljen u programu javnog radio emitera Radio Berane, gdje su prostor dobili Vuksanovićeva, Milačić i Bojanić. Na Radiju Crne Gore Dedić je dobio najviše prostora, dva sata i osam minuta, pet minuta više od Bojanića, dok je Đukanović bio u programu pola sata, koliko i Vuksanovićeva. Milačić je u programu tog javnog emitera dobio 36 minuta, Kalač 41, Miličković sat i devet minuta.