Francuska, Njemačka, Španija, Italija i Engleska, sve same evropske supersile, važile su prije početka Eura za glavne favorite. Po bukmejkima, ali i po svim drugim, fudbalskim parametrima.
Nakon što je odigrana prva faza Evropskog prvenstva, veže ih još jedan, nevjerovatan detalj - sve nabrojane selekcije nalaze se na istoj strani kostura nokaut faze, sve će se ukrstiti prije finalne utakmice.
A ko je na drugoj strani? Belgijanci, Portugalci, Hrvati, uz Vels, Poljsku, Švajcarsku...
Así quedan los octavos de finalhttps://t.co/eDGvVwy8h5 #EURO2016 pic.twitter.com/bcRA72YCE6
— Mundo Deportivo (@mundodeportivo) June 22, 2016
Nevjerovatan splet okolnosti u šest grupa, uz promijenjeni sistem takmičenja Eura, donio je do izrazite podjele kvaliteta. Dok se finalisti prošlogodišnjeg Eura, Italijani i Španci, zajedno sa domaćinima Francuzima i svjetskim prvacima Njemcima, sve uz začin zvani Engleska, budu lomili na putu ka finalu, na drugoj strani kostura Hrvati (ili Portugalci) i Belgijanci, imaće otvoren put do same završnice!
Kako je nastala ovakva gužva velikana na desnoj polovini žrijeba?
Od izrazitih favorita, samo su domaćini Francuzi i svjetski šampioni Njemci opravdali renome i osvojili prva mjesta u svojim grupama.
„Trikolori” i „elf”, dva glavna favorita prije početka Eura, znali su da bi u slučaju osvajanja grupa mogli da se sudare u polufinalu, ali nisu marili na to, niti su kalkulisali. Uostalom, ko stigne do polufinala mora da računa da će igrati protiv jake reprezentacije.
Francuzi i Njemci, međutim, nisu računali na nešto drugo... Nisu računali da će se na njihovom putu do polufinala naći Španija i Engleska.
„Crvena furija”, aktuelni evropski prvak, blistala je u prva dva kola, što je u jednom momentu gurnulo na vrh bukmejkerske liste favorita za osvajanja prvenstva. Ekipa Visentea del Boskea je potom čudesno poražena od kombinovanog sastava Hrvatske, dozvolivši sebi „luksuz” da 2. mjestom izabere neuporedivo teži put do završnice, natjeravrši italijansku „Gazetu delo sport” da razvuče naslov - Mama mia!
Upravo su Italijani najveći nesrećnici ovako čudnog raspleta u grupama. „Azuri” su napravili iznenađenje, doduše ne tako izrazito, osvojivši prvo mjesto u grupi ispred blago favorizovane Belgije. Kada su vidjeli gdje ih to vodi, momci Antonija Kontea vjerovatno su zažalili što nisu bili drugi, ili čak treći!?
Pogledajte kako izgleda italijanski put do završnice: u osmini finala evropski šampioni Španci, u eventualnom četvrtfinalu najvjerovatnije svjetski šampioni Njemci, u eventulnom polufinalu, vjerovatno domaćini Francuzi! Može li teže?
"Trikolori” prije toga moraju da eliminišu Engleze, pod uslovom da se u osmini finala ne dogode velika iznenađenja. Upravo je Gordi Albion drugi veliki „gubitnik” prve faze Eura, uz evropske prvake Špance.
Umjesto da osvajanjem prvog mjesta u grupi ostanu na lijevoj strani žrijeba i izaberu daleko lakši put do završnice, izabranici Roja Hodžsona su sve privilegije prepustili komšijskom Velsu. I izabrali da u četvrtfinalu idu na Francuze, u eventualnom polufinalu na Špance, Italijane ili Njemce.
Završen je prvi krug, završeno je zagrijavanje, kreće pravi „lom”. Ali, samo na desnoj strani kostura, gdje se dogodila nestvarna koncentracija kvaliteta.
Bonus video:
