Danis Tanović u trci za Zlatnog medvjeda u Berlinu

Festival će otvoriti “The Grandmaster”, film o borilačkim vještinama reditelja Vonga Kar Vaija, sa Ziji Džang i Tonijem Lengom
0 komentar(a)
Berlinale, Foto: Berlinale.de
Berlinale, Foto: Berlinale.de
Ažurirano: 14.01.2013. 13:03h

Berlinski filmski festival objavio je dio takmičarskog programa, a među filmovima u trci za Zlatnog medvjeda je i novi film bosanskog oskarovca Danisa Tanovića “Epizoda u životu berača željeza”, pored novih ostvarenja reditelja kao što su Stiven Soderberg, Ulrih Zajdl, Gas van Sant i Džafar Panahi.

Van konkurencije, a u takmičarskom programu, biće prikazan američki animirani 3D film “The Croods”

Festival će otvoriti “The Grandmaster”, film o borilačkim vještinama reditelja Vonga Kar Vaija, sa Ziji Džang i Tonijem Lengom, a među petnaestak naslova koji su za sada najavljeni u takmičarskom programu 63. Berlinala, koji će biti održan od sedmog do 17. februara, našli su se i filmovi iz SAD, Belgije, Francuske, Njemačke, Irana, Holandije, Južne Afrike, Južne Koreje, Austrije, Čilea i Rumunije.

Specijalnu projekciju i svjetsku premijeru imaće van konkurencije njemački dokumentarni film “Redemption Impossible”. Soderbergov film “Side Effects” sa Džudom Louom, imaće međunarodnu premijeru, kao i debitantski američki film “The Necessary Death of Charlie Countryman” Fredrika Bonda, te Van Santov “Promised Land”.

Ostali naslovi imaće svjetske premijere, a među njima su francuski filmovi “Camille Claudel 1915” sa Žilijet Binoš i “On my Way” s Katrin Denev, francusko-njemačko-belgijski “The Nun”, njemački “Gold”, koprodukcija Njemačke, Južne Afrike, Francuske i Holandije “Layla Fourie”, kao i “Parde (Closed Curtain)” iranskog reditelja Džafara Panahija koji je u kućnom pritvoru u Teheranu, uz višegodišnju zabranu rada i komunikacije sa medijima. Njegov saradnik na tom ostvarenju, kao i na ranijem dokumentarcu “Ovo nije film”, ponovo je Kambozia Partovi.

Dva filma iz prošlogodišnje konkurencije Berlinala našla su se među kandidatima za Oskara za najbolji strani film

Van konkurencije, a u takmičarskom programu, biće prikazan američki animirani 3D film “The Croods”. Ranije je najavljeno da će u takmičarskom programu 63. Berlinala biti čileansko-španski film “Gloria”, južnokorejski “Nobody's Daughter Haewon”, zatim austrijski “Paradise: Hope”, novi nastavak Zajdlove trilogije, te rumunski “Child's Pose”.

Prošle godine, na 62. Berlinalu, Zlatnog medvjeda osvojila je italijanska zatvorska doku-drama “Cezar mora da umre” filmskih veterana braće Taviani. Gran pri žirija, na čelu sa britanskim rediteljem Majkom Lijem, dobio je mađarski film “Samo vjetar” Benedeka Fliegaufa, inspirisan ubistvima Roma u Mađarskoj 2008. i 2009. godine.

Najboljim rediteljem proglašen je Kristijan Pecold za film “Barbara” koji je bio jedan od favorita za Zlatnog medvjeda, a govori o ženi koja je pravila plan da pobjegne iz Istočne Njemačke.

Inače, dva filma iz prošlogodišnje konkurencije Berlinala našla su se među kandidatima za Oskara za najbolji strani film, a to su kanadski “War Witch” i danski “A Royal Affair”, koji je odnio nagrade za najboljeg glumca i scenario.

Tanović jedini iz regiona

Novi film Tanovića, nagrađenog Oskarom za “Ničiju zemlju”, koprodukcija je Bosne i Hercegovine s Francuskom i Slovenijom, a jedini je iz regiona koji je najavljen u glavnom programu 63. Berlinala.

Tanovićev film imaće svjetsku premijeru na Berlinalu, na kojem je 2006. godine Zlatnog medvjeda osvojila sarajevska rediteljka Jasmila Žbanić dramom “Grbavica”. Film je baziran na istinitom događaju i govori o otuđenju i diskriminaciji u savremenom društvu BiH.

Radnja prati Nazifa koji izdržava svoju porodicu skupljajući staro gvožđe. Nakon što je njegovoj supruzi Senadi uskraćen prijeko potreban tretman za spontani pobačaj, Nazif će uraditi sve što je u njegovoj moći da joj spasi život - očajnički skupljajući još otpadnog metala, tražeći pomoć od nevladinih i državnih institucija.

Narednih deset dana Nazif i Senada će u potpunosti iskusiti okrutnost savremenog društva. Uloge u filmu ostvarili su Nazif Mujić, Senada Alimanović, Sandra Mujić i Šemsa Mujić.

Bonus video: