Vozač Mercedesa Luis Hamilton pobijedio je danas u trci Formule 1 za Veliku nagradu Njemačke i preuzeo prvo mjesto u generalnom plasmanu od Sebastijana Fetela iz Ferarija, koji nije završio trku.
Hamilton je ostvario četvrtu pobjedu u sezoni, a 66. u karijeri. On je trku u Hokenhajmu počeo sa 14. mjesta, ali je zahvaljujući dobroj vožnji, ali i tome što je do tada vodeći Fetel u 52. krugu izletio sa staze, uspio da ostvari važnu pobjedu u šampionatu.
Drugo mjesto zauzeo je vozač Mercedesa Valteri Botas, a treći je bio Kimi Raikonen iz Ferarija.
Vozač Red Bula Maks Verstapen zauzeo je četvrto mjesto, peti je bio Niko Hulkenberg iz Renoa, a šesto mjesto zauzeo je Roman Grožan iz Hasa. Bodove su još osvojili vozači Fors Indije Serhio Peres i Esteban Okon, Markus Erikson iz Zaubera i Brendon Hartli iz ekipe Toro Roso.
Hamilton sada ima 188 bodova u generalnom plasmanu, 17 više od Fetela.
Naredna trka, pred jednomjesečnu pauzu u šampionatu, na programu je naredne nedjelje za Veliku nagradu Mađarske, na Hungaroringu.
Bonus video:
