Najavljuje novi album

Alen Islamović objavio rok baladu

Numera "Znak" dopala mu se na prvo slušanje

2670 pregleda 0 komentar(a)
Foto: Printscreen YouTube
Foto: Printscreen YouTube

Emotivnom rock baladom “Znak” nekadašnji pjevač Bijelog dugmeta Alen Islamović najavljuje novi studijski album. No ova pjesma ne najavljuje samo novo izdanje već i malo drugačiji zvuk.

Islamović je već godinama uglavnom autor pjesama koje snima, međutim ovoga puta pjeva baladu koju su napisali Vojislav Dragović (muziku) i Katarina Ćurić (tekst), a dopala mu se na prvo slušanje.

“Dosta sam sarađivao s Kikijem Lesendrićem i njegovom grupom Piloti pa sam prije otprilike tri godine upoznao i klavijaturistu Vojislava Dragovića koji se ponudio da mi napiše pjesmu. Prihvatio sam ponudu i prije godinu dana sam čuo numeru ‘Znak’ koja me pomjerila iz nekih mojih razmišljanja. Katarina Ćurić, koja takođe sarađuje s grupom Piloti, napisala je odličan tekst, a ono što me privuklo pjesmi je to što je neobična čak i za mene koji je izvodim", ispričao je o novom singlu Islamović.

Svjestan je da numere poput "Znak" ne postaju veliki komercijalni hitovi, ali ostaju uz izvođača duže vrijeme i rado su slušane.

"To su pjesme koje ne blijede, naprotiv, godinama samo prerastaju u ultimativne hitove. Spot je takođe neuobičajen, rađen u animaciji i takav video dosad nisam imao, a prve reakcije su odlične”, objasnio je Alen Islamović.

Zanimljiv animirani videospot režirala je Snežana Trstenjak- Vasilijana Snežna, a uz nju animaciju potpisuje i Miloš Mandić.