Hrvatski muzičar snimio spot za numeru “Izbor je tvoj”

Muzičko odrastanje Damira Kedža

Ovom numerom Kedžo najavljuje novi album

1265 pregleda 0 komentar(a)
Foto: Printscreen Youtube
Foto: Printscreen Youtube

Hrvatski muzičar Damir Kedžo odvažio se za najveći muzičko-vizualni iskorak do sada.

Naime, riječ je o njegovom novom singlu “Izbor je tvoj” za koji je snimljen spot u veličanstvenoj jordanskoj pustinji Wadi Rum. Nakon skoro godinu muzičkog zatišja, Kedžo je odlučio da se publici predstavi u drugačijem stilu kojim najavljuje treći studijski album.

Kedžo se u emotivnoj i snažnoj pjesmi prvi put predstavlja kao autor muzike, dok stihove potpisuju Ivan Huljić i Matija Cvek. Ističe kako je na pjesmi radio godinu:

”Prva ideja nastala je u novembru prošle godine i od tada sam je radio s producentom Hrvojem Domazetom. Ivan Huljić i Matija Cvek su autori teksta koji savršeno opisuje i pojedine lične borbe, a ujedno je i pjesma s kojom se publika može poistovjetiti. Okušavši se kao autor muzike otvorio sam vrata prema novoj dimenziji u sopstvenoj muzici i neizmjerno se radujem pjesmama na kojima radimo”, ispričao je Kedžo.

Kedžo, kao jedan od najcjenjenijih i najtraženijih hrvatskih vokala svoje generacije, navodi kako je pjesma “Izbor je tvoj” korak prema zrelijem izražaju, te uvertira u treći studijski album:

”Ovu godinu sam odlučio da posvetim sebi i stvaranju novih pjesama pa sam tako proteklih mjeseci intenzivno u studiju, kako bi finalizirali treći studijski album na kojem radimo da bude moje ‘muzičko odrastanje’. Posebno mi je drago da imam priliku da radim sa ljudima sa kojima dijelim vizije prema životu i muzici, poput Ivana i Matije”.

Veličanstveni kadrovi jordanske pustinje Wadi Rum vizualni su iskorak u kojem je Kedžo pokazao da je idući korak zasigurno put prema internacionalnoj karijeri, što priželjkuje i Damirova publika. Spot potpisuju kreativni dvojac produkcije Lumiere, Artem Dushkin i Mateo Jurčić.