I današnji dan je počeo uobičajeno rano, okupljanjem u lobiju hotela već u sedam sati. Prvo smo posjetili muzej koji oživljava priču o provinciji Fujian, poznatoj kao Put svile. U muzeju smo uživali u fotografisanju u tradicionalnoj kineskoj nošnji, dodatno utkavši dio lokalne kulture u naše iskustvo.
Nakon muzeja svi smo se uputili na raskošan ručak. U svečanoj sali hotela dočekao nas je sto koji se prostirao čitavom površinom sale, a svaka djevojka imala je svoje obilježeno mjesto. Ispred nas se protezala bina, pružajući nam priliku da uživamo u tradicionalnoj kineskoj muzici tokom ručka. Svakih 15 minuta smjenjivala su se jela, a trpeza je bila obilna. Iako je kineska hrana poznata po specifičnom ukusu, šef kuhinje se potrudio da prilagodi ukuse kineske kuhinje nama poznatoj hrani.
Nakon degustacije desetak jela, zahvalili smo se organizatorima i krenuli prema starom gradu Kvandžu (Quanzhou), spremni na dalje istraživanje i otkrivanje bogate kineske kulture i istorije. Stari grad Kvandžu očarao nas je svojom jedinstvenom atmosferom. Nezavršene građevine odražavale su prepoznatljivu kinesku arhitekturu.
Ponovo smo uživali u zvucima kineske muzike, a nakon toga smo prisustvovali lutkarskoj predstavi. Po povratku u hotel saznali smo da će se održati prvi krug takmičenja za talent šou.
Odlučila sam se predstaviti poskočicom, vjerujući da je to idealna prilika da pokažem dio crnogorske kulture. Svi prisutni su bili zadivljeni dinamikom crnogorske narodne igre i ljepotom naše narodne nošnje. U tom trenutku osjećala sam ne samo radost zbog ličnog doprinosa, već i čast što mogu dijeliti dio svoje kulture na internacionalnom događaju. Nastup je bio nezaboravan trenutak saradnje, razmjenjivanja i poštovanja različitosti kroz umjetnost. Iskoristila sam priliku kako bih prisutne organizatore naučila da odigraju poskočicu. Glavna asistentkinja, euforično pridruživši se, počela je da uči korake. Međutim, ubrzo je priznala da je poskočica fizički jako zahtjevna.
Na kraju se proba završila smijehom, a svi smo postali svjesni kako smo kroz ovu jedinstvenu situaciju stvorili poseban trenutak povezanosti između različitih kultura i ljudi.
Na kraju noći smo dobili brošuru u kojoj su predstavljene sve takmičarke. Uz slike takmičarki, bile su navedene osnovne informacije: ime i prezime, ime države, visina i mjere. Osim činjenice da će brošura poslužiti kao vodič publici i žiriju, ona je postala svojevrsni album uspomena svjedočeći o jedinstvenim trenucima koje smo zajedno proživjele na ovom takmičenju.
Bonus video:
