MIRIŠE NA JABUKE, ŽIVI K'O PODSTANAR

Ko je bila Milena iz kultne pjesme Novih fosila?

"To je obećana pjesma. Milena je majka dvoje djece i priča je vrlo lična. To je zapravo priča o svim medicinskim sestrama", otkrio je Rajko Dujmić godinama kasnije

20128 pregleda 46 reakcija 7 komentar(a)
Rajko Dujmić, frontmen "Novih fosila", Foto: Printscreen YouTube
Rajko Dujmić, frontmen "Novih fosila", Foto: Printscreen YouTube

Rajko Dujmić, frontmen Novih fosila preminuo je danas od posljedica saobraćajne nesreće koju je doživio prošle srijede. Iza njega plodna je karijera, a jedan od najvećih hitova za koje je Rajko Dujmić napisao muziku je 'Milena'.

Prava Milena, koja je inspirisala taj hit bila je medicinska sestra iz Negotina na Vardaru, piše Index.hr.

"To je obećana pjesma. Milena je majka dvoje djece i priča je vrlo lična. To je zapravo priča o svim medicinskim sestrama", otkrio je Rajko Dujmić godinama kasnije.

Drugom prilikom otkrio je malo više detalja. "Milena je danas udata i ima dvoje djece. Ona je Makedonka, iz Negotina na Vardaru. Upoznali smo se u Herceg Novom i Bog zna kako smo razgovarali i dogovarali do tri ujutro. Onda je ispratim do sobe i ispred vrata joj kažem - ti ćeš završiti u pjesmi. Ona meni kaže - ti to svakoj govoriš. Kažem joj - vidjećeš. Ne odem s njom u sobu, okrenem se i odem", rekao je.

"Zapravo ta pjesma je posvećena medicinskim sestrama. To je život jedne medicinske sestre iz provincije koja je došla u grad i ima iznajmljenu sobu. Život joj je u smjenama - dnevna-noćna. Nikad nema stalnog frajera", dodao je.

Jednom prilikom, Milena koja je postala dio vječnog hita je javno komentarisala pjesmu.

"Ispala je dobra pjesma, koju svi i danas slušaju i drago mi je zbog toga", rekla je tada.