festival RUTA GRUPA TRIGLAV

Predstava “Konji ubijaju, zar ne?” na Brionima

Komad Gradskog pozorišta biće izveden večeras u 21 čas

984 pregleda 1 komentar(a)
Foto: Promo
Foto: Promo

Predstava Gradskog pozorišta Podgorica “Konji ubijaju, zar ne?”, koju je po tekstu Maje Pelević režirao Kokan Mladenović, biće izvedena večeras u 21 čas na Brionima, u okviru Regionalne unije teatara - festivala RUTA GRUPA TRIGLAV.

U predstavi igraju: Dušan Kovačević, Marija Đurić, Omar Bajramspahić, Vanja Jovićević, Goran Slavić, Jelena Simić, Dejan Đonović, Branka Femić/Ivona Čović, Vukan Pejović, Katarina Krek i Željko Radunović.

"Predstava je metafora naših života. Naše vlasti, kapitalizma, gdje vam na početku obećavaju dobitak i boljitak, upotrijebi vas i zloupotrijebi, a na kraju završite poniženi, odbačeni kao otpad nekog novog čovječanstva. Ta vrsta besramnog izrabljivanja ljudi dok ih tjeraju da svojim poniženjem i krvlju zabavljaju ljude jeste nešto što je u ovoj predstavi dominantno“, kazao je ranije reditelj Mladenović.

Za scenografiju predstave je zadužena Andreja Rondović, scenski pokret i koreografiju Miloš Isailović, kostimografiju Lina Leković, a za muziku Irena Dragović. Dramaturškinja je Dragana Tripković.

RUTA Grupa Triglav je mreža partnerskih pozorišta iz gradova zemalja regije koju, uz Gradsko pozorište iz Podgorice, čine i pozorište Ulysses, Mestno gledališče ljubljansko, Beogradsko dramsko pozorište, Kamerni teatar 55 iz Sarajeva i Dramski teatar Skoplje.

“Ideja koja stoji iza regionalne unije je otvaranje vrata za saradnju između pozorišta u regionu, kako bi se podstakla interakcija, kako između profesionalaca iz pozorišne struke, tako i s publikom kojoj se pruža prilika za upoznavanje s recentnom pozorišnom produkcijom iz susjednih zemalja. RUTA Grupa Triglav zamišljena je kao niz festivala koji bi se u razmacima od nekoliko mjeseci održavali u gradovima domaćinima iz kojih dolaze potpisnici projekta”, podsjećaju iz Gradskog pozorišta.