Lako se pripremaju - teleći medaljoni u sosu od pečuraka

Ako tražite ručak koji ne zahtijeva sate provedene u kuhinji, teleći medaljoni u sosu od pečuraka odličan su izbor.

Mekano teleće meso u kremastom sosu bogatog ukusa savršeno se slaže uz pire krompir, rižu ili domaću tjesteninu.

Sastojci

Za tri do četiri osobe potrebno je:

• 600 do 700 grama telećih medaljona
• 300 grama pečuraka
• jedan manji crni luk
• dva čena bijelog luka
• 150 mililitara pavlake za kuvanje
• 100 mililitara bijelog vina
• 200 mililitara temeljca
• kašičica senfa
• maslinovo ulje
• puter
• so i biber
• svježi peršun

Priprema

Medaljone prvo treba posoliti i pobiberiti, a zatim ih kratko propržiti na dobro zagrijanom tiganju sa malo maslinovog ulja i putera. Dovoljno je po nekoliko minuta sa svake strane kako bi dobili lijepu zlatnu koricu, a ostali mekani i sočni iznutra.

Kada je meso gotovo, vadi se iz tiganja, a u isti sud dodaju se sitno sjeckani crni i bijeli luk. Nakon nekoliko minuta dodaju se pečurke isječene na listove i prže dok ne omekšaju i dobiju boju.

Zatim se sipa bijelo vino koje treba kratko da ispari, nakon čega se dodaju temeljac, senf i pavlaka za kuvanje. Sos se kuva nekoliko minuta dok ne postane kremast i gust.

Na kraju se medaljoni vraćaju u sos kako bi upili ukuse, a jelo se posipa svježim peršunom.

Teleći medaljoni u sosu od pečuraka najbolje prijaju uz kremasti pire krompir i zelenu salatu.

Najvažnije je da se teletina ne prepeče, jer sočnost daje ovom jelu poseban ukus.